Sam Fender pritet të jetë një nga emrat kryesorë të Glastonbury 2027

Këngëtari britanik, Sam Fender, pritet të jetë një nga artistët kryesorë të Festivalit Glastonbury vitin e ardhshëm, ku sipas raportimeve të The Mail on Sunday, do të ngjitet në skenën kryesore Pyramid Stage në qershor 2027.

Edhe pse programi zyrtar i festivalit nuk do të konfirmohet deri në pranverë, burime pranë organizimit kanë bërë të ditur se këngëtari 32-vjeçar do të jetë një nga emrat kryesorë të edicionit të ardhshëm.

Fender po përjeton një periudhë të suksesshme në karrierë, veçanërisht pas suksesit të këngës Rein Me In, dueti i tij me Olivia Dean, i cili qëndroi për 23 javë në krye të klasifikimit britanik, sipas raportimit, shkruan DailyMail.

Një burim pranë këngëtarit ka zbuluar se ai është shumë i emocionuar për këtë mundësi, duke e konsideruar një moment të rëndësishëm në karrierën e tij.

Ndërkohë, këngëtari Lewis Capaldi thuhet se ka mbështetur ngjitjen e Fender në skenën kryesore, duke e ftuar më parë të performojë në koncertet e tij për të rritur vëmendjen ndaj muzikës së tij.

Sam Fender ka performuar më herët në skenën Pyramid të Glastonbury-t në vitin 2022, pasi tri vite më parë ishte detyruar të anulonte një paraqitje në momentin e fundit për shkak të problemeve shëndetësore.

Festivali Glastonbury nuk u zhvillua këtë vit, pasi organizatorët kishin planifikuar një vit pushimi për t’i dhënë tokës së Worthy Farm kohë të rikuperohej.

Ndërkohë, biletat për edicionin e vitit 2027, me kapacitet rreth 210 mijë pjesëmarrës, u shitën brenda vetëm 42 minutash, edhe pse emrat e artistëve nuk ishin bërë ende publikë. /Telegrafi/