Ukrainasit modifikojnë tankun Abrams për ta përdorur në sulme tokësore

Pjesëtarët e Regjimentit të 475-të Sulmues të Ukrainës kanë modifikuar një tank amerikan M1A1 Abrams, të furnizuar nga Australia, duke e shndërruar në një mjet të blinduar rëndë për mbështetjen e këmbësorisë.

Pamjet e publikuara nga llogaria analitike OSINTtechnical në rrjetin X tregojnë automjetin e modifikuar duke qëlluar me predha të kalibrit 120 milimetra drejt një brezi pemësh nën kontrollin e forcave ruse.

Sipas analistit ushtarak amerikan David Axe, i cili shkruan për portalin Trench Art, Regjimenti i 475-të Sulmues po zhvillon operacione mbrojtëse në rajonin e Harkivit, përgjatë kufirit verilindor të Ukrainës me Rusinë.

Njësia po eksperimenton me taktika të reja luftarake, duke kombinuar tanket dhe automjetet luftarake të pajisura me mbrojtje shtesë me dronë përgjues dhe dronë të rëndë bombardues.

Dronët përgjues përdoren për të shkatërruar në ajër dronët rusë FPV, ndërsa dronët e rëndë sulmojnë pozicionet ruse dhe shkatërrojnë minat e dronët që presin në pritë në tokë.

Sipas Axe, regjimenti ka vendosur mbrojtje shtesë kundër dronëve në tanket amerikane M1 Abrams dhe automjetet luftarake M2 Bradley. Sasia e madhe e blindimit shtesë ua ndryshon pamjen dhe funksionin këtyre mjeteve, duke i afruar me konceptin e tankeve kazemate, të cilat nuk kanë frëngji rrotulluese.

Ky konfigurim i ngjan automjetit gjerman Sturmgeschütz III, të përdorur gjatë Luftës së Dytë Botërore. Ai ishte ndërtuar mbi shasinë e tankut Panzer III, por në vend të frëngjisë kishte një strukturë të blinduar fikse me top.

Ndërkohë, kjo nuk është hera e parë që Ukraina i pajis tanket Abrams me mbrojtje shtesë kundër dronëve. Një prej metodave të përdorura është e ashtuquajtura mbrojtje “iriq”, e përbërë nga kabllo metalike të shpalosura, të cilat synojnë ta ngatërrojnë dronin ose ta aktivizojnë atë para se të arrijë te automjeti.

Kjo metodë u shfaq në tanket ruse në vjeshtën e vitit 2025. Në shkurt të këtij viti, në rajonin e Zaporizhjës u filmua edhe një tank ukrainas M1A1 me këtë lloj mbrojtjeje.

Sipas portalit Defence Blog, tanku u godit nga një dron rus FPV ndërsa ishte i palëvizshëm. /Telegrafi/