Sigurimet shëndetësore shtrenjtohen në Zvicër: Ja si mund të kurseni qindra franga në vit

Nga viti 2027, banorët e Zvicrës do të përballen me një tjetër rritje të sigurimeve shëndetësore. Ekspertët tregojnë se ndryshimi i kompanisë së sigurimit dhe zgjedhja e modelit të përshtatshëm mund të sjellin kursime të konsiderueshme.

Rritja e vazhdueshme e kostos së jetesës në Zvicër do të rëndojë edhe më shumë buxhetet familjare gjatë vitit të ardhshëm. Primet e sigurimit të detyrueshëm shëndetësor pritet të rriten mesatarisht me 5%, duke arritur në 412 franga në muaj.

Sipas gazetës zvicerane Blick, qytetarët kanë disa mundësi për të zvogëluar shpenzimet, edhe pse çmimet e sigurimeve vazhdojnë të rriten.

Një nga mundësitë kryesore është krahasimi i ofertave dhe kalimi në një kompani tjetër sigurimi. Megjithëse kompanitë janë të detyruara të ofrojnë të njëjtat përfitime ligjore në sigurimin bazë, çmimet e tyre ndryshojnë ndjeshëm.

Sipas një analize të AXA-s, personat që ndryshojnë për herë të parë kompaninë e sigurimit kursejnë mesatarisht 563 franga në vit. Edhe ndryshimet e mëvonshme mund të sjellin kursime, mesatarisht 383 franga në vit.

Një mundësi tjetër është zgjedhja e një modeli sigurimi që kufizon përzgjedhjen e lirë të mjekut. Në varësi të moshës dhe vendbanimit, kursimet mund të arrijnë rreth 100 franga në muaj.

Edhe zgjedhja e franshizës, pra shumës që i siguruari paguan vetë përpara se sigurimi të fillojë të mbulojë shpenzimet, mund të ndikojë ndjeshëm në koston vjetore. Megjithatë, franshiza e lartë nuk është domosdoshmërisht e përshtatshme për personat që kanë shpenzime të rregullta mjekësore.

Afati i rëndësishëm: 30 nëntori

Personat që dëshirojnë të ndryshojnë kompaninë e sigurimit bazë për vitin 2027 duhet të veprojnë në kohë.

Sipas Zyrës Federale të Shëndetit Publik, kërkesa për ndërprerjen e kontratës duhet të mbërrijë te kompania aktuale jo më vonë se 30 nëntori 2026. Rekomandohet që letra të dërgohet deri më 15 nëntor, mundësisht me postë të regjistruar.

Për krahasimin e çmimeve, qytetarët mund të përdorin platformën zyrtare të Konfederatës Zvicerane, Priminfo.

Për familjet shqiptare që jetojnë në Zvicër, krahasimi i sigurimeve mund të jetë veçanërisht i rëndësishëm, pasi kursimet për disa anëtarë të familjes mund të përbëjnë një shumë të konsiderueshme gjatë vitit.

Burimi: Blick; Zyra Federale e Shëndetit Publik (BAG)