Rama i qëndron ftesës për dialog

Kryeministri i Shqipërisë, Edi Rama, ka përsëritur të premten ftesën për dialog me studentët, të cilët prej më shumë se 20 ditësh po kërkojnë dorëheqjen e tij.

Para ndërtesës së Kryeministrisë është vendosur sërish tryeza e gurtë gjashtëkëndore, mbi të cilën kryeministri ka lënë letra me mbishkrimin “dialog”. Tryeza ndodhet aty prej më shumë se dy javësh dhe ka mbetur simboli i ftesës së qeverisë për hapjen e një lidhje komunikimi me protestuesit.

Megjithatë, studentët deri tani kanë refuzuar çdo ftesë të kryeministrit për të u ulur në bisedime, duke mbajtur të pandryshuar kërkesën e tyre kryesore: dorëheqjen e Ramës.

Vetëm një ditë më parë, gjatë një paraqitjeje përkrah ambasadores së Bashkimit Evropian, Rama kishte paralajmëruar se të premten do të hapsej një mundësi e re dialogu për të gjithë ata që dëshirojnë të bisedojnë me të. Por ndërsa dera e bisedimeve mbetet e hapur nga ana e qeverisë, kryeministri ka refuzuar kërkesën për dorëheqje, e cila vazhdon të jetë pika qendrore e kërkesave të studentëve protestues.

Protestat kanë kaluar ditën e 20-të, ndërsa përpjekjet e kryeministrit për të nisur bisedimet nuk kanë marrë deri tani asnjë përgjigje pozitive nga studentët. Konfrontimi mes refuzimit për dialog dhe refuzimit për dorëheqje e ruan tensionin politik, që prej më shumë se tre javësh ka mbajtur në qendër të vëmendjes hapësirën përballë Kryeministrisë. /KosovaNews/