Mbeturinat shqetësojnë Prishtinën, “Pastrimi” thotë se po punon me kapacitete maksimale
Kompania Rajonale e Mbeturinave “Pastrimi” ka njoftuar se po punon me kapacitetet maksimale në dispozicion për të grumbulluar mbeturinat në sa më shumë lagje të Prishtinës, ndërsa gjatë ditës qytetarët kanë raportuar për mbeturinat e grumbulluara në pjesë të ndryshme të kryeqytetit.
Mbeturinat e mbledhura në hapësira publike kanë shkaktuar shqetësime te banorët, të cilët kanë kërkuar pastrim të rregullt dhe zgjidhje për gjendjen e krijuar.
Përveç grumbullimit të mbeturinave, gjatë ditës janë ngritur edhe shqetësime të tjera lidhur me mungesën e kontejnerëve, mungesën e informatave për linjat e autobusëve në stacione dhe mirëmbajtjen e rrugëve në kryeqytet.
Në reagimin e saj, kompania “Pastrimi” ka bërë të ditur se po përpiqet të kryejë shërbimin brenda kapaciteteve që ka në dispozicion, duke pasur parasysh orarin e deponisë në Mirash, ku bëhet zbrazja e kamionëve.
“Deponia në Mirash ku bëjmë zbrazjen e kamionëve mbyllet në orën 00:00, andaj po mundohemi me shpejtësi që të grumbullojmë mbeturina në sa më shumë lagje të jetë e mundur”, thuhet në njoftimin e kompanisë.
“Pastrimi” ka theksuar se po punon me kapacitetet maksimale për të ofruar shërbimin, ndërsa shqetësimet e raportuara gjatë ditës nga qytetarët dhe mediat kanë vënë në pah problemet me të cilat po përballen banorët në hapësirat publike të Prishtinës.
