Studentët kanë dorëzuar mbi 700 ankesa për standardin studentor

Mospërputhja e shumës së subvencionit për vaktin studentor me inflacionin, ndërprerjet e energjisë elektrike dhe ujit në konviktet studentore, vonesat në pagesën e bursave, transporti i shtrenjtë ndërurban dhe parregullsitë gjatë provimeve janë vetëm disa nga problemet me të cilat përballen studentët në vend.

Gjatë gjashtë muajve, përmes platformës së pavarur studentore “Studentaria“ janë dorëzuar mbi 700 raportime, ndërsa më shumë se 1.200 studentë të tjerë kanë votuar për problemet e raportuara.

Sipas Ana Shopovska nga platforma studentore “Studentaria”, standardi studentor nënkupton informimin në kohë dhe komunikimin funksional me institucionet kompetente.

“Standardi studentor nuk është vetëm pyetje për shumën e subvencionimit të bursave, subvencionimin e shujtës studentore, apo kushtet në dhomat e studentëve, por se a i merr studenti informacionet që duhet në kohë se për çfarë është notuar me atë notë, se a ka ku të drejtohet kur mendon se iu kanë thyer të drejtat, dhe se sa institucionet do t’u përgjigjen me kohë", deklaroi Ana Shopovska nga Platforma Studentore “Studentaria”.

Edhe pse shuma e subvencionit për vaktin studentor është 140 denarë në ditë, ajo nuk është rritur asnjëherë që nga viti 2023, pavarësisht detyrimit ligjor për përshtatjen e saj me inflacionin, theksoi Goshe Nikollov nga platforma. Sipas tij, një problem shtesë është ndërprerja e së drejtës për vaktin studentor të subvencionuar për shkak të mosdorëzimit në kohë të të dhënave nga fakultetet në Ministrinë e Arsimit dhe Shkencës (MASh).

“Studentët marrin të njëjtën mbështetje nga shteti, por atë që mund ta blinin me këto para në vitin 2023, sot mund vetëm ta ëndërrojnë. Ata nuk kërkojnë asgjë më shumë sesa respektimin e ligjit", theksoi anëtari i Platformës Studentore “Studentaria”, Goshe Nikollov.

Sipas anëtarit të platformës studentore “Studentaria”, Aleksandar Nikollovski, problem në vete paraqet edhe transporti publik, rritja e çmimeve të transportit ndërurban.

“Siç Qeveria vendosi rregullën që studentët në Shkup të kenë transport publik urban falas, kjo duhet t’u mundësohet edhe studentëve nga vendet tjera, sepse kjo është diskriminuese për ta. Studentët në Ohër, Prilep dhe Tetovë nuk e kanë këtë të drejtë", u shpreh anëtari i Platformës Studentore “Studentaria”, Aleksandar Nikollovski.

Platforma digjitale u ka mundësuar studentëve të paraqesin problemet me të cilat përballen. Hapi i radhës, sipas rekomandimeve, është që institucionet përgjegjëse të ndërmarrin masa konkrete, të përmirësojnë procedurat dhe të raportojnë në mënyrë transparente për zgjidhjen e problemeve të paraqitura.