Bosnja dhe Hercegovina dëboi dy diplomatë serbë për glorifikimin e Mlladiçit

Ministri i Punëve të Jashtme i Bosnjës dhe Hercegovinës, Elmedin Konakoviç, ka urdhëruar dëbimin e dy përfaqësuesve diplomatikë të Serbisë dhe u ka dhënë 48 orë kohë për të lëshuar vendin.
Vendimi i referohet atasheut ushtarak Milan Dulanoviç dhe Darko Maksimoviq – këshilltar i përfaqësuesit të Agjencisë Serbe të Informacionit të Sigurisë (BIA) në ambasadën serbe në Sarajevë, transmeton INA.

“Ata kanë 48 orë nga ora 14:00 për të braktisur Bosnjën dhe Hercegovinën. Ne do t’u anullojmë kartat diplomatike dhe do t’i bëjmë thirrje korit diplomatik që të ndërpresë bashkëpunimin me ata”, tha Konakoviç në konferencën e jashtëzakonshme për shtyp më 8 shtator.

Vendimi është marrë në përputhje me rregullat për shpalljen e personave të padëshiruar dhe të papranueshëm, të miratuara nga Presidenca e Bosnjës dhe Hercegovinës në vitin 2004.

Konakoviç i lidhi veprimet e tij me ngjarjet në Serbi gjatë ditëve të fundit dhe me glorifikimin e Ratko Mlladiçit, i dënuar për gjenocid dhe krime lufte në Bosnjë dhe Hercegovinë.

“Kjo që bënë dje, pardje dhe ditët e mëparshme, i ka kaluar të gjitha vijat e kuqe”, tha ai.
Kreu i diplomacisë paralajmëroi gjithashtu se Bosnja dhe Hercegovina po tërheq pëlqimin për deklaratën e përbashkët për marrëdhënie të fqinjësisë së mirë dhe bashkëpunim rajonal, e cila ishte planifikuar të nënshkruhej më 1 tetor në Mal të Zi.

“Ne nuk do të nënshkruajmë deklarata të tilla dhe dokumente boshe derisa po shohim Serbinë e ditëve të fundit – Serbinë e viteve 1990. Kjo na paralajmëron se situata nuk është normale”, tha Konakoviç. Qeveria e Malit të Zi është njoftuar për vendimin.

Nga kabineti i kryesuesit të Presidencës së Bosnjës dhe Hercegovinës për Radio Evropa e Lirë thanë se ende nuk kanë një qëndrim rreth vendimeve të Konakoviçit. Ministria e Punëve të Jashtme e Serbisë, gjithashtu, nuk iu përgjigj kërkesës së mediave.
Një ditë më parë, Konakoviç paralajmëroi se do të tërhiqet pothuajse i gjithë stafi diplomatik i ambasadës së Bosnjës dhe Hercegovinës në Beograd. Ambasadori dhe konsulli mund të mbeten, pasi vendimet për emërimin dhe shkarkimin e tyre merren nga Presidenca e shtetit.

Ky veprim vë në dyshim organizimin e votimit në ambasadë në Beograd për zgjedhjet e përgjithshme në Bosnjë dhe Hercegovinë më 4 tetor. Sipas të dhënave të Komisionit Qendror të Zgjedhjeve, për të votuar në Serbi janë paraqitur 2.425 persona.
Konakoviç tha se autoritetet do të bëjnë gjithçka të mundur për të organizuar procesin zgjedhor, por se ai është i gatshëm të marrë përgjegjësinë nëse nuk mbahet votimi në ambasadë. Pritet që aktivitetet konsullore të zhvendosen në ambasadat e Bosnjës dhe Hercegovinës në Zagreb dhe Podgoricë.
Tërheqja e pothuajse gjithë stafit të ambasadës është ndër lëvizjet më serioze diplomatike midis Bosnjës dhe Hercegovinës dhe Serbisë që nga vendosja e marrëdhënieve në vitin 2000