Konjufca takon Escobarin në Amerikë, “rroket” tema e Asociacionit
Konjufca takon Escobarin në Amerikë, “rroket” tema e Asociacionit
Kryetari i Kuvendit të Kosovës, Glauk Konjufca, ka takuar sot në SHBA emisarin amerikan për dialogun, Gabriel Escobar.
Në një postim në Facebook, Konjufca ka thënë se me Escobarin kanë diskutuar për zhvillimet aktuale politike në vend dhe rajon, shkruan lajmi.net.
Në kuadër të kësaj, ai tha se ka folur me Escobar për Marrëveshjen e Ohrit dhe hapat e radhës për normalizimin e raporteve mes Kosovës dhe Serbisë.
“Ritheksuam qëndrimin e shtetit të Kosovës, por edhe garantimin e Departamentit të Shtetit, se nuk mund të formohet kurrfarë asociacioni apo ndonjë mekanizëm tjetër që cenon sovranitetin, pavarësinë, integritetin territorial dhe rendin kushtetues të Republikës së Kosovës”, tha Konjufca.
Postimi i plotë i Konjufcës:
Sot, në kuadër të vizitës sime zyrtare në Shtetet e Bashkuara të Amerikës, i shoqëruar nga ambasadori i Republikës së Kosovës në Ëashington DC, Ilir Dugolli dhe Shefi i Stafit, Ilir Kërçeli, takova Zëvendës Ndihmës Sekretarin e Shteteve të Bashkuara të Amerikës njëherësh Përfaqësues Special për Ballkanin Perëndimor, z.Gabriel Escobar.
Në takimin përmbajtësor me z.Escobar diskutuam për zhvillimet aktuale politike në vend dhe rajon, për procesin e dialogut dhe marrëveshjen e Ohrit, si dhe hapat e mëtejmë për normalizimin e plotë të marrëdhënieve ndërmjet Republikës së Kosovës dhe Serbisë.
Ritheksuam qëndrimin e shtetit të Kosovës, por edhe garantimin e Departamentit të Shtetit, se nuk mund të formohet kurrfarë asociacioni apo ndonjë mekanizëm tjetër që cenon sovranitetin, pavarësinë, integritetin territorial dhe rendin kushtetues të Republikës së Kosovës.
Ndamë pikëpamje të njëjta që të vazhdojmë të punojmë së bashku për agjendën e përbashkët të anëtarësimit të Kosovës në strukturat euroatlantike dhe organizata ndërkombëtare, e po ashtu edhe për avancimin e marrëdhënieve dypalëshe mes Republikës së Kosovës dhe Shteteve të Bashkuara të Amerikës. /Lajmi.net/
