SHBA tërheq bombarduesit nga baza në Britani, Rubio sqaron vendimin

Sekretari amerikan i Shtetit, Marco Rubio, ka deklaruar se tërheqja e bombarduesve amerikanë nga baza RAF Fairford në Britani nuk lidhet drejtpërdrejt me arrestimin e pesë personave pranë bazës.

“Departamenti i Luftës po rishpërndan vazhdimisht burimet aty ku nevojiten. Rotacionet e avionëve janë gjithashtu diçka normale”, tha Rubio.

Pentagoni konfirmoi se bombarduesit, përfshirë B-1, B-2 dhe B-52, janë rikthyer në bazat e tyre në SHBA.

Megjithatë, sipas raportimeve amerikane, disa prej avionëve u larguan me urgjencë pasi u shfaqën informacione të reja lidhur me kërcënimin e mundshëm.

Më 27 shtator, RAF Fairford ishte në qendër të një incidenti të dyshuar terrorist, ndërsa pesë shtetas britanikë u arrestuan pranë bazës nën dyshimin për vepra që lidhen me eksplozivë dhe terrorizëm.

Një shtetas britaniko-iranian u arrestua gjithashtu më 1 tetor.

Autoritetet britanike kanë deklaruar se baza mbetet e sigurt.

Ndërkohë, kryeministri britanik më herët tha se kishte “indikacione të forta” për përfshirje të Iranit në incident, pretendim që Teherani e ka mohuar.

RAF Fairford është një pikë e rëndësishme e operacioneve amerikane në Evropë dhe shërben si bazë e avancuar për bombarduesit e Forcave Ajrore amerikane. /Telegrafi/