Pse veturat janë më shtrenjtë në Maqedoni se në Kosovë e Shqipëri? Krahasimi tronditës i çmimeve

Dallimet drastike në tregun e automjeteve kanë vënë sërish në pikëpyetje politikat e çmimeve dhe taksimit, pasi një krahasim i fundit ka nxjerrë në pah se jo vetëm automjetet elektrike, por edhe të gjitha veturat e tjera në Maqedoni shiten dukshëm më shtrenjtë krahasuar me vendet fqinje, Kosovën dhe Shqipërinë.

Analiza e çmimeve të modeleve të markës së njohur BYD dëshmon më së miri këtë pabarazi financiare (çmimet janë pa llogaritur shpenzimet shtesë të importit):

BYD Atto 2 EV: Në Shqipëri kushton 17.200 €, në Kosovë 21.000 €, ndërsa në Maqedoni kap shifrën e lartë prej 34.700 €.

BYD Atto 3 / Evo: Shënon çmimin 18.900 € në Shqipëri dhe 27.000 € në Kosovë, krahasuar me 38.800 € në Maqedoni.

BYD Sealion 7 / 07: Ndërkohë që në Shqipëri shitet për 28.900 € dhe në Kosovë për 42.000 €, në Maqedoni ky model arrin në 47.000 €.

Ky fenomen ka ngritur shqetësime dhe reagime të ashpra në opinionin publik.

Ekspertët dhe qytetarët theksojnë se rasti i BYD-së nuk është një përjashtim, por pasqyron një trend më të gjerë ku konsumatorët në Maqedoni ballafaqohen rregullisht me kosto shumë më të larta për automjetet krahasuar me rajonin, duke rënduar ndjeshëm xhepat e blerësve. (INA)