Pse është e rëndësishme fitorja për Kongresin amerikan?

Në zgjedhjet e sotme, amerikanët vendosin se kush do ta kontrollojë Kongresin, gjë që do të ndikojë në atë se sa do të jetë në gjendje presidenit Donald Trump ta zbatojë politikën e tij gjatë dy viteve të mbetura të mandatit.

Kongresi është parlamenti amerikan dhe përbëhet nga Senati dhe Dhoma e Përfaqësuesve, shkruan cnn.

Në Dhomën e Përfaqësuesve, shtetet më të mëdha kanë më shumë përfaqësues, pasi kanë popullsi më të madhe. Ndërsa në Senat, secili shtet dërgon nga dy senatorë, pavarësisht numrit të banorëve.

Çdo ligj duhet të marrë miratimin e të dyja dhomave. Senati, ndër të tjera, konfirmon emërimet e presidentit në pozita të rëndësishme shtetërore.

Kongresi vendos gjithashtu për buxhetin e shtetit dhe mbikëqyr punën e administratës presidenciale.

Nëse demokratët fitojnë shumicën në njërën ose në të dyja dhomat, Trumpi do ta ketë më të vështirë miratimin e ligjeve dhe financimin e planeve të tij.

Në të njëjtën kohë, demokratët do të mund ta shtojnë mbikëqyrjen ndaj punës së administratës së tij dhe të nisin hetime. /Telegrafi/