Prediabeti nuk është e thënë të zhvillohet në diabet: Ndryshimet që mund ta ulin rrezikun

Sheqeri në gjak mund të jetë mbi normalen për vite të tëra pa u vërejtur. Por disa ndryshime në ushqyerje, peshë dhe aktivitet fizik mund ta ndryshojnë rrjedhën e sëmundjes

Prediabeti është një gjendje që shpesh zhvillohet në heshtje. Niveli i sheqerit në gjak është më i lartë se normalja, por ende nuk ka arritur vlerat që përcaktojnë diabetin e tipit 2. Shumë njerëz jetojnë me këtë çrregullim pa e ditur, pasi zakonisht nuk shfaq simptoma të dallueshme.

Megjithatë, diagnoza e prediabetit nuk nënkupton se diabeti është i pashmangshëm. Zbulimi i hershëm dhe ndryshimet e qëndrueshme të stilit të jetesës mund ta ulin ndjeshëm rrezikun.

Sipas Qendrave Amerikane për Kontrollin dhe Parandalimin e Sëmundjeve (CDC) , prediabeti lidhet edhe me rrezik të shtuar për sëmundje të zemrës dhe goditje në tru.

Kilogramët e tepërt dhe dhjami në bark e rrisin rrezikun

Mbipesha, veçanërisht grumbullimi i yndyrës në zonën e barkut, ushqyerja jo e shëndetshme dhe mungesa e aktivitetit fizik janë ndër faktorët kryesorë që ndikojnë në zhvillimin e prediabetit.

Yndyra e tepërt abdominale lidhet me rezistencën ndaj insulinës, gjendje në të cilën qelizat nuk reagojnë siç duhet ndaj këtij hormoni. Si pasojë, organizmi e ka më të vështirë ta mbajë sheqerin në gjak brenda kufijve normalë.

Sipas Shoqatës Amerikane të Diabetit (ADA) , prediabeti mund të identifikohet përmes tri analizave:

Mjeku përcakton analizat e nevojshme dhe interpretimin e rezultateve, transmeton Telegrafi.

14 nëntori – Dita Botërore e Diabetit

Çdo vit, më 14 nëntor, shënohet Dita Botërore e Diabetit, në ditëlindjen e Frederick Bantingut, njërit prej shkencëtarëve që kontribuuan në zbulimin e insulinës në vitin 1921.

Kjo ditë u themelua në vitin 1991 nga Federata Ndërkombëtare e Diabetit dhe Organizata Botërore e Shëndetësisë, ndërsa në vitin 2006 mori njohjen zyrtare të Kombeve të Bashkuara.

Qëllimi është ndërgjegjësimi për parandalimin, diagnostikimin e hershëm dhe trajtimin e diabetit.

Ushqyerja mesdhetare dhe ecja mund ta ndryshojnë rrjedhën e sëmundjes

Lajmi inkurajues është se prediabeti mund të mbahet nën kontroll dhe përparimi drejt diabetit të tipit 2 mund të parandalohet ose të vonohet.

Sipas udhëzimeve të ADA-s për vitin 2026 , ulja e peshës trupore me 5–7 për qind, e kombinuar me të paktën 150 minuta aktivitet fizik në javë, është ndër masat më të efektshme parandaluese.

Studimet e programeve të strukturuara të parandalimit kanë treguar se këto ndërhyrje mund ta ulin rrezikun e zhvillimit të diabetit të tipit 2 deri në 58 për qind.

Për rezultate më të mira, rekomandohet:

Edhe mënyra e përgatitjes ka rëndësi. Zierja, gatimi në avull dhe pjekja në furrë janë alternativa të përshtatshme ndaj skuqjes së shpeshtë.

Pse nuk duhet pritur shfaqja e simptomave?

Diabeti i tipit 2 mund të zhvillohet gradualisht, pa shenja të dukshme. Nëse mbetet i pazbuluar, me kalimin e kohës mund të dëmtojë zemrën, enët e gjakut, veshkat, sytë dhe nervat.

Prandaj, kontrolli periodik i glicemisë, sidomos te personat me mbipeshë, histori familjare të diabetit ose aktivitet të kufizuar fizik, është një hap i rëndësishëm.

Prediabeti është një paralajmërim, jo një diagnozë e pashmangshme e diabetit. Ndryshimet e vogla, por të vazhdueshme, mund të kenë ndikim të madh në shëndetin afatgjatë. /Telegrafi/