Pamje të reja të tërmetit të fuqishëm prej 7.7 ballësh që goditi Panamanë

Një tërmet i fuqishëm me magnitudë 7.7 goditi Panamanë më 9 tetor, duke shkaktuar dëme të konsiderueshme materiale dhe duke lënduar dhjetëra persona.

Lëkundjet u ndien në pjesë të ndryshme të vendit, përfshirë kryeqytetin, ku banorët e frikësuar u larguan me nxitim nga ndërtesat e larta.

Sipas të dhënave të fundit nga shërbimet e emergjencës, të paktën 27 persona kanë pësuar lëndime të lehta. Ndërkohë, më shumë se 400 ndërtesa janë dëmtuar nga tërmeti, përfshirë 188 institucione arsimore.

Pavarësisht fuqisë së lëkundjeve dhe dëmeve të shkaktuara, deri më tani nuk është raportuar për viktima.

Pas tërmetit kryesor janë regjistruar më shumë se 100 lëkundje pasuese, duke mbajtur banorët në gjendje alarmi.

Autoritetet po vlerësojnë dëmet dhe situatën në zonat e prekura, ndërsa ekipet e emergjencës po vazhdojnë punën për të përcaktuar shkallën e dëmtimeve.

Tërmeti ishte ndër më të fuqishmit që kanë goditur Panamanë në vitet e fundit. /Telegrafi/