Jo vetëm Ukraina, Trumpi paralajmëron marrëveshje që prek gjithë Evropën

Presidenti amerikan, Donald Trump, ka deklaruar se një marrëveshje e mundshme për përfundimin e luftës mes Rusisë dhe Ukrainës mund të përfshijë edhe vende të tjera evropiane, madje potencialisht të gjithë kontinentin.

Duke folur për gazetarët në Shtëpinë e Bardhë, Trumpi tha se konflikti mund të marrë fund së shpejti, por nuk zbuloi detaje rreth përmbajtjes së planit.

Deklaratat e tij erdhën pas një takimi me Kirill Dmitrievin, të dërguarin special të presidentit rus, Vladimir Putin, shkruan nytimes .

“Do të përfshijë më shumë sesa Ukrainën. Madje mund të them se mund të përfshijë të gjithë Evropën”, deklaroi Trumpi.

Ndërkohë, dhëndri i presidentit amerikan, Jared Kushner, bëri të ditur se synimi i SHBA-së është të adresojë shqetësimet e sigurisë të të gjitha palëve, përmes zgjidhjeve praktike që do të parandalonin shpërthimin e konflikteve të reja.

Në kuadër të zhvillimeve diplomatike, Zonja e Parë amerikane, Melania Trump, zhvilloi gjithashtu një takim në Shtëpinë e Bardhë me zyrtarë rusë dhe ukrainas, lidhur me një armëpushim humanitar në qytetin Oleshky, në rajonin e Khersonit.

Megjithatë, Trumpi nuk ka dhënë hollësi se cilat vende evropiane mund të përfshihen në marrëveshjen e mundshme dhe çfarë do të përmbajë konkretisht plani për përfundimin e luftës. /Telegrafi/