“BE-ja ta lidhë integrimin e Serbisë me zbardhjen e fatit të të zhdukurve dhe hapjen e arkivave”

Ekonomisti austriak dhe kryetari i Komitetit Austriak për Zgjerimin e NATO-s, Günther Fehlinger-Jahn, kërkon që Bashkimi Evropian ta lidhë procesin e integrimit evropian të Serbisë edhe me bashkëpunimin e plotë për zbardhjen e fatit të personave të zhdukur nga lufta e Kosovës. Ai kërkon hapjen e arkivave, dokumentimin e plotë historik dhe zbulimin e vendeve të varreve.

“Bashkimi Evropian duhet ta bëjë bashkëpunimin e plotë për personat e zhdukur, arkivat, vendet e varreve dhe dokumentacionin historik një pjesë të rëndësishme të procesit të integrimit evropian të Serbisë”, deklaron Fehlinger-Jahn.

Ai i drejtohet drejtpërdrejt edhe kryetarit të SNS-së, Millosh Vuçeviç, lidhur me arrestimin e nëntë personave në Zubin Potok, duke kërkuar që çdo pretendim për pafajësinë e tyre të mbështetet në prova dhe jo në retorikë politike.

“Nëse besoni se nëntë burrat e arrestuar janë të pafajshëm, mbrojini në gjykatë. Nëse besoni se provat janë fabrikuar, ekspozojeni fabrikimin me prova. Nëse policia ka shkelur të drejtat e tyre, dokumentojeni shkeljen”, shprehet ai.

ImageGünther Fehlinger-JahnFoto galeri Foto galeri
Sipas Fehlinger-Jahn, deklaratat politike nuk mund t’u japin përgjigje provave materiale dhe fatit të personave të zhdukur.

“Por të quash gjithçka ‘terror’ dhe ‘spastrim etnik’ nuk i shpjegon trupat. Retorika politike nuk i identifikon të zhdukurit. Fushata zgjedhore nuk u përgjigjet provave forenzike. Dhe kalendari zgjedhor i Serbisë nuk mund ta përcaktojë kalendarin e hetimeve penale në Kosovë”, thekson ai.

Në këtë kuadër, Fehlinger-Jahn kërkon vigjilencë të shtuar gjatë muajit tetor, veçanërisht në një periudhë të ndjeshme politike në Serbi. Ai apelon që çdo përgjigje ndaj retorikës politike të bazohet në dokumente dhe prova të verifikueshme.“Jini vigjilentë. Dokumentoni gjithçka. Mos iu përgjigjni propagandës me propagandë. Përgjigjuni me fakte, arkiva, ADN, prova forenzike dhe të drejtë ndërkombëtare”, deklaron Fehlinger-Jahn.

Në përmbyllje të deklaratës së tij, ai e vendos theksin te personat e pagjetur dhe e drejta e familjeve për ta ditur të vërtetën dhe për t’i pasur pranë të dashurit e tyre.

“Gjeni çdo person të zhdukur. Hapni çdo arkiv relevant. Zbuloni çdo varr. Identifikoni çdo viktimë. Kthejeni çdo viktimë të mundshme te familja. Sillini të vdekurit e Kosovës në shtëpi, aty ku familjet e tyre e dëshirojnë. Nderojini me dinjitet. Përcaktoni çdo zinxhir përgjegjësie. Jepni llogari për çdo krim që ende mund të provohet”, përfundon ai.

Fehlinger-Jahn e mbyll mesazhin e tij me një apel të drejtpërdrejtë për zbardhjen e plotë të së kaluarës.

“27 vjet janë mjaftueshëm gjatë. Asnjë person i zhdukur nuk duhet harruar. Asnjë varr i fshehur nuk duhet injoruar. Asnjë viktimë e identifikuar nuk duhet të mbetet pa një kthim dinjitoz. Asnjë arkiv relevant nuk duhet të mbetet i mbyllur. Të gjitha viktimat të evidentohen. Të gjitha faktet të përcaktohen. E vërteta së pari. Drejtësia e bazuar në prova. Pastaj pajtimi”, përfundon Günther Fehlinger-Jahn.