Njësia e Inteligjencës Financiare edhe më tutje me ushtrues detyre
Njësia e Inteligjencës Financiare edhe më tutje me ushtrues detyre
Tash e më shumë se një vit, pozita e njësisë së inteligjencës financiare, në kuadër të Ministrisë së Financave mbetet me ushtrues detyre.
Kjo njësi që merret me parandalimin dhe luftimin e pastrimit të parave dhe financimin e terrorizmit në nivel kombëtar, sipas shoqërisë civile duhet të ketë udhëheqës me mandat të plotë për funksionuar në mënyrë të duhur.
Në mesin e shumë pozitave që janë me ushtrues detyre, tash e më shumë se 1 vit, edhe Njësia e Inteligjencës Financiare, në kuadër të Ministrisë së Financave, është në të njëjtën situatë.
Që nga shkarkimi i Dardan Nuhiut, nga kjo pozitë, pas publikimit të disa incizimeve, në gusht të vitit 2021, kjo njësi operon pa drejtor.
Një konkurs i hapur në vitin e kaluar, ishte anuluar pasi, asnjë nga kandidatët nuk kishte arritur të plotësonte të gjitha kriteret e parapara.
Ministri i Financave, Hekuran Murati, shkurt ka thënë se së shpejti ky mekanizëm i rëndësishme i shtetit do të ketë drejtor, dhe beson që s’do përsëritet e njëjta situatë.
“Besoj që shumë shpejtë, konkursi është…besoj që po”, ka thënë Hekuran Murati – Ministër i Financave.
Për rëndësinë e kësaj njësie flasin nga shoqëria civile, të cilët thonë se kjo pozitë duhet të ketë udhëheqës me mandat të plotë, RTV Dukagjini.
“Njësia për Inteligjencë financiare merret me rastet e publikimit të dhënave për shpëlarje të parave, pra është një institucion mjaftë i rëndësishëm, dhe në raste të tilla dhe raste të tjera ku institucionet udhëhiqen nga ushtrues të detyrës, është pak problematike që të shkojë mënyra në mënyrën e duhur për atë arsye kërkohet, që të zgjidhet sa më shpejtë drejtori dhe kjo agjenci të funksionojë me një drejtor i cili ka mandat të plotë”, ka deklaruar Lavdim Makshana – IKD.
Por, nuk është vetëm pozita e drejtorit në këtë njësi me ushtrues detyre, pasi që edhe disa anëtarë të bordit mbikëqyrës janë të tillë. Kryetar i bordit, është ministri i Financave, derisa aty janë edhe kryeprokurori i Kosovës e drejtori i Policisë, pozita këto që janë aktualisht me ushtrues detyre.
Përveç tyre, në bordin mbikëqyrës, janë edhe ministri i Punëve të Brendshme, Drejtori i Administratës Tatimore, Drejtori i Përgjithshëm i Doganave të Kosovës dhe Guvernatori i Bankës Qendrore të Republikës së Kosovës.
