Donika Kadaj Bujupi kritikon ashpër Avdullah Hotin: “I fundit që mund të flasë për moral politik”
Këshilltarja e presidentes Vjosa Osmani, Donika Kadaj- Bujupi ka reaguar ndaj deklaratave të ish-kryeministrit Avdullah Hoti, duke e cilësuar atë si “njeriun e fundit në Kosovë që mund të flasë për moral politik”.
Në një postim në Facebook, Bujupi kujton kohën kur Hoti mori detyrën e kryeministrit, duke thënë se ai u bë nëpërmjet “shkeljes dhe keqpërdorimit të vullnetit qytetar, pa fituar vota për vete dhe në mënyrë krejtësisht kundërkushtetuese”.
Ajo shton se gjatë mandatit të tij Hoti u nënshtrua para presidentit të Serbisë, Aleksandër Vuçiq, dhe e quan modelin e tij të politikbërjes “shembulli më i keq që qytetarët duhet të shmangin”.
Postim i plotë:
Avdullah Hoti është njeriu i fundit në Kosovë që mund të flasë për moral politik.
I bërë kryeministër nëpërmjet shkeljes e keqpërdorimit të vullnetit qytetar, pa vota të tij, në mënyrë krejtësisht kundërkushtetuese, e duke u nënshtruar para Vuçiqit për ata pak muaj sa ishte kryeministër; modeli i tij i politikbërjes është shembulli më i keq që qytetarët shumë moti e kanë kuptuar se nuk duhet ta ndjekin. Edhe sot paska tentuar të mashtrojë sërish.
Sa i përket deklaratës së Presidentes sot, ajo ka qenë e qartë se votimi i zgjatjeve buxhetore, Planit të Rritjes, buxhetit të RTK-së, qindra miliona të Bankës Botërore, etj., janë çështje në vullnet të partive politike të përfaqësuara në Kuvend. Pra, në vullnet të të gjitha partive, e jo vetëm njërës apo tjetrës. Presidentja ka propozuar që, meqë partitë opozitare nuk janë dakord që këto vendime e ligje të procedohen në Kuvend nga Qeveria në detyrë, kjo të bëhet nga Presidentja (brenda kompetencave kushtetuese) dhe nga vetë deputetët (përsëri brenda suazave kushtetuese). Kjo gjë jo vetëm që lejohet, por është e parashikuar në mënyrë taksative në Kushtetutë dhe në ligjet në fuqi.
Pra, mundësia për të kaluar edhe Planin e Rritjes, edhe zgjatjet buxhetore, edhe marrëveshjet me Bankën Botërore, edhe buxhetin e RTK-së dhe shumë vendime të tjera ekziston. Por, ekzistojnë edhe njerëz si Hoti që i gënjejnë qytetarët pa pikë turpi, sepse në asnjë moment nuk mendojnë se moskalimi i këtyre vendimeve mund t’i humbë Kosovës mbi 1 miliard euro, dhe në mungesë të buxhetit mund t’i lë mijëra familje pa paga, pa ushqim, pa barna të nevojshme, e pa institucione funksionale. Hotit, natyrisht, kjo s’i intereson ashtu si nuk i ka interesuar kurrë. Prioritet e ka të sulmojë Presidenten. Njësoj si atëherë kur thoshte se “Vjosa Osmani do të marrë zero vota”
