32-vjeçarja nga Shkupi pëson djegie të rënda, u përpoq të ndizte zjarr me benzinë

Një grua 32-vjeçare nga Shkupi ka pësuar djegie të rënda trupore në një incident të ndodhur në fshatin Oreshan të Shkupit, pasi është përfshirë nga flakët gjatë përpjekjes për të ndezur zjarr me benzinë.

Sipas informacioneve të Ministrisë së Punëve të Brendshme (MPB), rasti është raportuar më 10 nëntor, rreth orës 20:40, pasi gruaja me inicialet S.S. është sjellë me lëndime të rënda nga djegiet në Kompleksin e Klinikave “Nënë Tereza” në Shkup.

Nga raportimi fillestar bëhet e ditur se ajo është lënduar në fshatin Oreshan, teksa po përpiqej të ndizte zjarr duke përdorur benzinë.

Pas raportimit, zyrtarët policorë kanë dalë në vendngjarje, ndërsa po ndërmerren masa për zbardhjen e plotë të rrethanave të incidentit.

Deri më tani nuk janë bërë të ditura hollësi të tjera lidhur me gjendjen shëndetësore të gruas.