26 vjeçari shqiptar dëbohet nga Italia, kapet pa leje qëndrimi dhe dërgohet me avion në Tiranë

Një 26 vjeçar shqiptar është dëbuar nga Italia, pasi është kapur duke qëndruar në territorin italian pa leje qëndrimi.

Sipas mediumit italian Rietinvetrina, shqiptari u ndalua gjatë një kontrolli të Policisë së Shtetit në komunën Fara in Sabina, në provincën e Rietit.

Gjatë verifikimit të dokumentacionit, policia konstatoi se 26 vjeçari nuk posedonte leje qëndrimi. Ai u shoqërua në selinë e policisë në Rieti, ku Zyra e Emigracionit kreu verifikimet për statusin e tij administrativ.

Nga kontrollet rezultoi se shqiptari nuk e kishte rregulluar asnjëherë qëndrimin e tij në Itali, transmeton Telegrafi.

Pas përfundimit të procedurave, ndaj tij u nxor vendimi për dëbim nga territori italian.

Pas konfirmimit të vendimit nga gjykatësi i paqes, me urdhër të kuestorit të Rietit, policia e shoqëroi shqiptarin drejt aeroportit Fiumicino, ku ai u nis me avion drejt Tiranës.

Sipas të dhënave të publikuara nga policia italiane, që nga fillimi i vitit në provincën e Rietit janë nxjerrë 73 vendime dëbimi ndaj shtetasve të huaj, ndërsa 44 prej tyre janë ekzekutuar përmes riatdhesimit të menjëhershëm ose dërgimit në qendrat e qëndrimit për riatdhesim. /Telegrafi/