Krasniqi: Albin Kurti pranoi gjithçka që kishte premtuar se nuk do të pranonte

Krasniqi: Albin Kurti pranoi gjithçka që kishte premtuar se nuk do të pranonte

Kryetari i PDK-së, Memli Krasniqi, ka reaguar pas marrëveshjes së arritur mbrëmë mes Kosovës dhe Serbisë.

Përmes një shkrimi në Facebook, Krasniqi është shprehur se kryeministri Albin Kurti ka pranuar gjithçka që kishte premtuar se nuk do të pranonte, përcjell lajmi.net.

“Me 27 shkurt, në Bruksel, Kryeministri Kurti e pranoi propozimin evropian. Dje, me 18 mars, ai u dakordua edhe për aneksin e zbatimit të kësaj marrëveshjeje. Në më pak se tri javë, Albin Kurti pranoi gjithçka që kishte premtuar se nuk do të pranonte, përgjatë tërë jetës së tij politike me predikime të rrejshme e mashtrime të panumërta”, ka shkruar Krasniqi.

Tutje, ai ka theksuar se kjo marrëveshje nuk i arrin qëllimet shtetërore të Kosovës dhe se brezat e ardhshëm do ta trashëgojnë për vite me radhe konfliktin e ngrirë me Serbinë.

“Por, përtej mashtrimeve të tij, brenga ynë mbetet Kosova, qyetarët tanë dhe brezat e ardhshëm, të cilët, fatkeqësisht, përveç që e kanë humbur besimin në perspektivën që ofron Kosova, do ta trashëgojnë për vite me radhe konfliktin e ngrirë me Serbinë. Dhe kjo është pasojë direkte e gabimeve të Albin Kurtit që ka negociuar dhe mundësuar këtë marrëveshje që është e pamjaftueshme për Kosovën dhe që nuk i arrin qëllimet tona shtetërore e qytetare”.

“Marrëveshja pa njohje reciproke, e përqendruar në një asociacion të avancuar e autonomi politike për komunitetin serb dhe pa garanci për integrimin euro-atlantik të Kosovës është dështim i madh politik e kombëtar, të cilin do ta paguajmë shtrenjtë dhe gjatë, të gjithë”, vijoi Krasniqi./Lajmi.net/