Votimet për Bërvenicën, ja sa votues dolën deri në ora 11:00

Dalja në votime në zgjedhjet e parakohshme për kryetar të Komunës së Bërvenicës deri në orën 11:00 është 9,11 për qind. Të drejtën e votës e kanë shfrytëzuar 1.480 qytetarë, njoftoi kryetari i Komisionit Shtetëror të Zgjedhjeve (KSHZ), Bojan Mariçiq.

Ai bëri të ditur se votimi ka nisur me kohë, në orën 7:00, në të gjitha vendvotimet dhe po zhvillohet pa probleme më të mëdha.

Sipas Mariçiqit, dalja në votime është pak më e lartë krahasuar me zgjedhjet lokale të tetorit 2025, kur deri në orën 11:00 kishin votuar 8,34 për qind e votuesve, përkatësisht 1.346 qytetarë.

Ai vizitoi gjashtë vendvotime në Brvenicë, ku konstatoi se procesi zgjedhor po zhvillohet në mënyrë të rregullt.