Valdrin Sahiti shihet në protestën kundër vrasjes së grave në Kosovë

Për të dytën ditë radhazi, qytetarët u mblodhën në protestë kundër vrasjes së grave dhe neglizhencës institucionale, pas rastit të Arlinda Zekajt në Pejë, duke kërkuar drejtësi dhe masa konkrete për mbrojtjen e grave.

Në mesin e protestuesve është parë edhe kreatori i njohur i modës, Valdrin Sahiti, i cili iu bashkua qytetarëve në këtë tubim.

Krahas tij, në protestë janë vërejtur edhe shumë figura të tjera publike, të cilat iu bashkuan thirrjeve për drejtësi dhe përgjegjësi institucionale.

Foto: Screenshot/IndeksOnline

Protesta u shoqërua me mesazhe të fuqishme, përmes të cilave qytetarët shprehën pakënaqësinë e tyre ndaj mënyrës se si institucionet po trajtojnë rastet e dhunës ndaj grave.

“Gjumi s’ka me ju marrë, flaka ka me ju dalë” dhe “Heshtja mbron dhunuesin, jo viktimën” ishin disa nga thirrjet që u dëgjuan gjatë tubimit, duke përcjellë kërkesën për reagim dhe llogaridhënie.

Pjesëmarrësit kërkuan që institucionet të ndërmarrin veprime konkrete për të parandaluar raste të tjera të tilla dhe për të garantuar sigurinë e grave, në vend që të mjaftohen vetëm me reagime pas tragjedive.

Protestuesit paralajmëruan se tubimet do të vazhdojnë derisa kërkesat e tyre të adresohen, duke kërkuar që drejtësia dhe siguria e grave të mos mbeten vetëm premtime, por të shoqërohen me veprime konkrete. /Telegrafi/