Shqiptaro-amerikani Aliçkaj: Përpjekjet e Serbisë në SHBA po dështojnë

Drejtor Ekzekutiv i Ligës Qytetare Shqiptaro-Amerikane, Agim-Aliçkaj, në një prononcim për “Bota sot”, ka deklaruar se rezoluta në Kongresin amerikan për integrimin e Kosovës në NATO është e rëndësishme sepse vlerëson arritjet e saj dhe mbështet stabilitetin në Ballkan.

Sipas tij, edhe pse nuk është ligj detyrues, ajo ka peshë politike, tregon mbështetje nga të dyja partitë në SHBA, forcon pozitën ndërkombëtare të Kosovës dhe ushtron presion ndaj vendeve që ende nuk e njohin.

Po ashtu, ai ka theksuar se ndikon që politika e jashtme amerikane të orientohet më shumë në favor të Kosovës.

“Prezantimi i një rezolute në Dhomën e Përfaqësuesve, në mbështetje të integrimit të Kosovës në NATO nga kongresistët amerikanë Keith Self, Ritchie Torres dhe Mike Laëler, ka rëndësi të veçantë për Republikën e Kosovës. Rezoluta vlerëson arritjet e Kosovës dhe argumenton se anëtarësimi i saj në NATO do të ndihmonte në stabilitetin e Ballkanit.

Aprovimi i kësaj rezolute në Kongres është një procedurë e caktuar. Pas kalimit në Dhomën e Përfaqësuesve, ajo duhet të prezantohet dhe të aprovohet edhe nga Senati amerikan, për t’u evidentuar si vendim i përbashkët i Kongresit amerikan.

Duhet pasur parasysh se rezoluta nuk është ligj detyrues, por ka efekt politik pozitiv, sepse tregon se në Amerikë ekziston mbështetje për Kosovën nga të dyja partitë kryesore. Ajo forcon pozicionin e Kosovës në arenën ndërkombëtare dhe rrit presionin diplomatik ndaj vendeve të NATO-s që ende nuk e kanë njohur pavarësinë e Kosovës, që ta bëjnë një gjë të tillë.

Njëkohësisht, ajo ndikon te Departamenti i Shtetit dhe administrata amerikane që politikën e tyre të jashtme ta orientojnë në favor të Kosovës, duke e vlerësuar atë si një interes strategjik amerikan”, ka thënë ai.

Po ashtu, Aliçkaj ka nënvizuar se rezoluta nuk e detyron NATO-n të veprojë, por dërgon sinjal të qartë për mbështetjen amerikane ndaj Kosovës.

Ai ka potencuar se anëtarësimi në NATO është proces i gjatë me shumë kushte, ku hapi i parë është përfshirja në Partneritetin për Paqe.

“Kjo rezolutë nuk e detyron NATO-n të ndërmarrë veprime konkrete në këtë drejtim, megjithatë ua bën të qartë vendeve anëtare, por edhe armiqve të Kosovës, interesin amerikan për Kosovën.

Anëtarësimi i Kosovës në NATO është një proces afatgjatë që kërkon plotësimin e shumë parakushteve, disa prej të cilave nuk varen nga Kosova. Megjithatë, Kosova duhet t’i kryejë detyrat e veta në këtë drejtim, ku faza e parë është inkuadrimi në Partneritetin për Paqe të NATO-s.

Kjo rezolutë tregon gjithashtu angazhimin e vazhdueshëm dhe të suksesshëm të individëve dhe organizatave të komunitetit shqiptaro-amerikan në interes të Kosovës dhe kombit shqiptar, posaçërisht të komunitetit në Dallas dhe në Neë York”, ka theksuar ai.

Tutje, Aliçkaj ka cekur se kongresmeni Keith Self dhe të tjerët po vazhdojnë traditën e mbështetjes amerikane për Kosovën nga figura të njohura të mëparshme.

Sipas tij, përpjekjet e Serbisë në SHBA po dështojnë, sepse sipas tij janë të padrejta dhe kundër vlerave perëndimore.

“Kongresmeni Keith Self, bashkë me disa anëtarë të tjerë të Kongresit, po vazhdojnë rolin historik të paraardhësve të tyre në Kongresin Amerikan, si Dole, Lantos, McCain, Biden, DioGuardi, Gilman, Hyde, Engel e të tjerë.

Përpjekjet e regjimit të prapambetur serb për të vepruar në SHBA nëpërmjet komunitetit serbo-amerikan po dështojnë dita-ditës, pavarësisht investimit të miliona dollarëve. Arsyeja është e thjeshtë: çështja e tyre është e padrejtë, agresive, anti-perëndimore dhe anti-njerëzore.

Detyrë parësore ekzistenciale e qeverisjes së Kosovës, krahas zhvillimit demokratik dhe ekonomik të shtetit, është forcimi i sundimit të ligjit, profesionalizmi i ushtrisë dhe stabiliteti politik. Orientimi pro-amerikan i Kosovës nuk guxon të vihet në pikëpyetje asnjëherë, në asnjë mënyrë. Pa Amerikë nuk ka Kosovë”, ka shtuar ai.

Në fund, Aliçkaj ka kritikuar opozitën për bllokimin e institucioneve dhe bojkotimin e zgjedhjes së Presidentit, duke thënë se kjo dëmton imazhin ndërkombëtar të Kosovës.

Ai u bën thirrje qytetarëve që të reagojnë me votë kundër atyre që, sipas tij, pengojnë shtetin për interesa partiake.

“Maskarada e vitit të kaluar e opozitës së Kosovës, me bllokimin e krijimit të institucioneve shtetërore pas zgjedhjeve demokratike, sidomos bojkotimi i fundit i zgjedhjes së Presidentit, po ndikon shumë negativisht në imazhin ndërkombëtar të Republikës së Kosovës.

Populli shumicë i Kosovës, edhe pse i lodhur dhe i dëshpëruar nga zgjedhjet e njëpasnjëshme të panevojshme, duhet të mobilizohet edhe njëherë dhe t’ua tregojë me votë vendin bllokuesve të shtetit për interesa personale dhe partiake”, ka përfunduar Aliçkaj.