Shoqata e Qumështorëve të Kosovës kërkon ndalimin e vajit të palmës

Shoqata e Qumështorëve të Kosovës ka ngritur një sërë shqetësimesh lidhur me gjendjen në sektorin e qumështit dhe ndikimin e përdorimit të vajit të palmës në industrinë përpunuese.

Sipas tyre, përdorimi i vajit të palmës në produktet e qumështit duhet të ndalohet menjëherë në fabrikat e përpunimit, pasi po dëmton rëndë prodhimin vendor dhe ekonominë e fermerëve lokalë.

Në deklaratë thuhet se “vaji i palmës është duke i shkatërruar dhe mbyllur fermat vendore”, duke shtuar se ai po ndikon negativisht edhe në shëndetin e konsumatorëve, si dhe po i bën të pavlefshme skemat e mbështetjes qeveritare për sektorin e qumështit.

Po ashtu, shoqata thekson se produktet me vaj palme dhe qumësht pluhur po e dëmtojnë imazhin e prodhimeve vendore në treg.

Në kërkesat e tyre drejtuar institucioneve, ata theksojnë:

Qumështi i fermerëve duhet të grumbullohet në çdo cep të Republikës së Kosovës.

Çmimi i qumështit të fermave duhet të kthehet në nivelin e mëparshëm.

Të ndalen reduktimet pa arsye të forta ekonomike.

Të përfundojnë vonesat në pagesat e qumështit, të cilat sipas tyre po zgjasin 3–6 muaj.

Shoqata apelon për ndërhyrje urgjente institucionale për të stabilizuar tregun dhe për të mbrojtur prodhimin vendor të qumështit në Kosovë.