Shiti gjithçka dhe udhëtoi 1.900 kilometra për dashurinë, por zbuloi se ishte krijuar me AI

Një 49-vjeçar nga Brazili shiti të gjitha gjërat e tij personale dhe udhëtoi mbi 1.900 kilometra për të takuar gruan me të cilën besonte se do të ndërtonte të ardhmen, por zbuloi se ajo ishte një personazh i krijuar me inteligjencë artificiale.

Edimar Rocha Martins kishte nisur të ndiqte profilin e një gruaje të quajtur Jessica Oliveira në rrjetet sociale që nga viti 2020.

I bindur se kishte gjetur dashurinë e jetës, më 9 tetor shiti gjithçka për të udhëtuar drejt Belo Horizonte, por me të mbërritur mësoi se gruaja nuk ekzistonte.

View this post on Instagram A post shared by Imirante (@imirante)

Profili, që kishte rreth 300 mijë ndjekës, publikonte video të një gruaje të krijuar me inteligjencë artificiale, e cila pretendonte se kërkonte një partner që do të jetonte me të në fermën e saj.

Personi që qëndronte pas profilit pranoi se personazhi ishte krijuar me AI, duke shpjeguar se synimi ishte rritja e ndërveprimeve për qëllime komerciale, por mohoi se kishte komunikuar drejtpërdrejt me Martinsin.

Pasi mbeti pa para, 49-vjeçari kërkoi ndihmë nga autoritetet lokale, të cilat i mundësuan kthimin në shtëpi.

Pavarësisht zhgënjimit, ai nuk ka hequr dorë nga kërkimi i dashurisë dhe thotë se do të kthehet sërish në Belo Horizonte me shpresën për të gjetur dikë me të cilin mund të ndërtojë një jetë të përbashkët. /Telegrafi/