SHBA-ja godet objektiva në ishullin Qeshm pas shpërthimit të minave që goditën pesë anije në Ngushticën e Hormuzit
Irani ka bërë të ditur se ushtria amerikane ka kryer disa sulme ajrore në ishullin Qeshm, në jug të vendit, ndërsa më herët gjatë së martës të paktën pesë anije janë goditur nga mina detare në Ngushticën e Hormuzit.
Zyrtarët iranianë thanë se sulmet amerikane u zhvilluan të martën në mbrëmje, ndërsa banorët raportuan se në zonë u dëgjuan të paktën pesë shpërthime.
Ahmad Nafisi, zëvendësguvernator i provincës Hormozgan, deklaroi për agjencinë zyrtare të lajmeve IRNA se sulmet amerikane nuk shkaktuan dëme në zonat e banuara apo ato tregtare.
“Situata në ishullin Qeshm është nën kontroll dhe të gjitha strukturat e emergjencës, shërbimeve dhe administratës janë në gatishmëri të plotë”, tha ai.
Agjencia IRNA raportoi se në qytetin Qeshm u dëgjuan “pesë deri në gjashtë shpërthime”. Ndërkohë, agjencia gjysmëzyrtare Fars, duke cituar banorë të ishullit, bëri të ditur se disa shpërthime u dëgjuan në veriperëndim të qytetit, ndërsa në të njëjtën kohë u pa tym që ngrihej në qiell.
Zyrtarë amerikanë konfirmuan të martën vonë se avionët luftarakë të SHBA-së kishin goditur pozicionet e lëshimit të raketave iraniane në ishull. Sipas tyre, sulmet janë pjesë e një strategjie të ngjashme me atë të ditëve të mëparshme dhe u ndërmorën si kundërpërgjigje ndaj sulmeve iraniane kundër personelit dhe aseteve amerikane.
Sulmet amerikane pasuan disa incidente në Ngushticën e Hormuzit, ku të paktën pesë anije u goditën nga mina detare gjatë lundrimit në rrugë që Irani i konsideron të “paautorizuara”.
Ushtria iraniane deklaroi se anijet duhet të koordinohen me forcat e armatosura të vendit për të kaluar në mënyrë të sigurt nëpër këtë korridor detar.
“Kalimi i sigurt kërkon koordinim me Forcat e Armatosura të Republikës Islamike të Iranit, lundrim përmes zonave të përcaktuara si të sigurta dhe mbajtjen aktive të sistemeve të navigimit”, thuhet në deklaratën e ushtrisë iraniane.
Ndërkohë, Garda Revolucionare e Iranit (IRGC) pretendoi të martën se kishte rrëzuar një dron amerikan të tipit MQ-1 Predator, të përdorur për zbulim dhe sulme, në ujërat jugore të vendit, pranë ishullit Qeshm.
Sipas Gardës Revolucionare, ky ishte droni i 18-të i këtij lloji që forcat iraniane pretendojnë se kanë shkatërruar.
Në një deklaratë, IRGC tha se kishte përdorur një “sistem të ri dhe të avancuar të mbrojtjes ajrore”, i cili, sipas saj, e kishte zbuluar dhe shkatërruar dronin rreth orës 13:45 sipas kohës lokale.
Më herët gjatë së martës, Garda Revolucionare pretendoi gjithashtu se kishte kryer një sulm me dronë ndaj një sistemi radarësh amerikanë në bazën ajrore Sheikh Isa në Bahrein.
Bahreini, ku ndodhet Flota e Pestë e Marinës amerikane, si dhe Komanda Qendrore e SHBA-së (CENTCOM), njoftuan se dronët ishin interceptuar dhe se nuk kishte pasur dëme.
IRGC deklaroi se sulmi ishte ndërmarrë si përgjigje ndaj “shkeljeve të përsëritura të hapësirës ajrore të Iranit nga dronët ushtarakë amerikanë”. /Telegrafi/
