Senatori Peters i shqetësuar për situatën në Shqipëri: Autoritetet të mos përdorin agresion ndaj protestuesve paqësorë

Senatori amerikan Gary Peters ka shprehur shqetësim të thellë për përshkallëzimin e situatës në Shqipëri, duke u bërë thirrje autoriteteve që të përmbahen nga veprimet agresive ndaj protestuesve paqësorë.

Përmes një reagimi, Peters ka kërkuar nga të gjitha palët që të kontribuojnë në uljen e tensioneve dhe të parandalojnë përshkallëzimin e mëtejshëm të dhunës.

“Jam thellësisht i shqetësuar për situatën në përshkallëzim në Shqipëri. Autoritetet lokale duhet të përmbahen nga agresioni ndaj protestuesve paqësorë, ndërsa të gjithë të përfshirët duhet të punojnë për uljen e tensioneve dhe parandalimin e dhunës së mëtejshme”, ka shkruar Peters.

Senatori amerikan ka theksuar gjithashtu se zhvillimet në Shqipëri kanë rëndësi të veçantë për komunitetin shqiptaro-amerikan në shtetin e Miçiganit, ku jeton një komunitet i madh dhe aktiv shqiptar.

“Miçigani është shtëpi e një komuniteti të fortë dhe të gjallë shqiptaro-amerikan, dhe e di se këto zhvillime janë shumë personale për shumë banorë të Miçiganit”, ka deklaruar ai.

Peters ka nënvizuar se qytetarët shqiptarë meritojnë një qeveri që respekton të drejtat e tyre themelore dhe sundimin e ligjit.

“Populli shqiptar meriton një qeveri që respekton të drejtat e tij themelore dhe mbron sundimin e ligjit. Prandaj, do të vazhdoj të angazhohem për paqe dhe drejtësi për të gjithë shqiptarët”, ka përfunduar senatori amerikan.

Reagimi i Peters vjen në kohën kur protestat në Tiranë janë shoqëruar me tensione dhe përplasje mes protestuesve dhe forcave të Policisë./Telegrafi.

I am deeply concerned by the escalating situation in Albania. Local authorities must refrain from aggression against peaceful protesters, and everyone on the ground must work to deescalate and prevent further violence. Michigan is home to a strong and vibrant Albanian American community, and I know these developments are very personal for many Michiganders. The Albanian people deserve a government that respects their fundamental rights and upholds the rule of law. That’s why I will continue to advocate for peace and justice for all Albanians. — Senator Gary Peters (@SenGaryPeters) October 19, 2026