Rizvanolli nxjerr dokumentin për vagonët: U nënshkrua në vitin 2017 nga qeveria Mustafa e Haradinaj

Ministrja në detyrë e Ekonomisë, Artane Rizvanolli, ka reaguar ndaj kritikave të opozitës për riparimin e vagonëve të Trainkos në Serbi, çështje e cila ditëve të fundit ka shkaktuar debat të madh politik.

Opozita, në veçanti përfaqësues të AAK-së, kanë kritikuar Qeverinë Kurti për dërgimin e vagonëve për riparim në Zrenjanin të Serbisë, duke e cilësuar si të papranueshme që një ndërmarrje publike e Kosovës të kryejë një procedurë të tillë në Serbi, sidomos pas sulmit terrorist në Banjskë. Deputeti i AAK-së, Daut Haradinaj, ka publikuar dokumente lidhur me riparimin, ndërsa Burim Ramadani ka kërkuar edhe shkarkimin e ministres Rizvanolli.

Në përgjigje ndaj këtyre kritikave, Rizvanolli ka rikthyer në vëmendje një rast të mëhershëm, duke argumentuar se riparimi i vagonëve në Zrenjanin nuk ka nisur me Qeverinë Kurti.

Sipas saj, vagonët ishin dërguar për herë të parë në Zrenjanin në vitin 2017, menjëherë pas blerjes së tyre. Ajo pretendon se procedura ishte iniciuar gjatë kohës së Qeverisë Mustafa dhe ishte përuruar gjatë Qeverisë Haradinaj, kur ministër i Infrastrukturës ishte Pal Lekaj i AAK-së.

Rizvanolli e ka shtruar kështu pyetjen ndaj AAK-së: a kishte qenë partia e brengosur për faktin se vagonët po riparoheshin në Serbi edhe në vitin 2017, kur ministri i saj, Pal Lekaj, kishte marrë pjesë në përurimin e tyre?

“Vagonët janë dërguar për riparim në Zrenjanin në Serbi për herë të parë më 2017, sapo janë blerë, në procedurë të nisur në kohë të Qeverisë Mustafa e të përuruar në kohë të Qeverisë Haradinaj, nga Ministri Pal Lekaj.

A ka qenë AAK-ja e brengosur për këtë çështje në vitin 2017 kur Ministri i tyre e prente shiritin për vagonët e riparuar në Serbi?”, ka shkruar Rizvanolli.

Debati tashmë është kthyer në një përplasje politike mes pozitës dhe opozitës: opozita kërkon përgjegjësi për kontratën e vitit 2024, ndërsa Rizvanolli argumenton se kritikat janë selektive dhe se dërgimi i vagonëve për riparim në Zrenjanin kishte ndodhur edhe më herët.

Sipas raportimeve të fundit, kontrata e vitit 2024 për riparimin e vagonëve në Serbi kap vlerën rreth gjysmë milioni euro. Ndërkohë, dokumentet e Trainkos të publikuara në media konfirmojnë se një komision i ndërmarrjes kishte kryer testimet e vagonëve në punëtorinë “Shin Voz” në Zrenjanin.

Çështja pritet të vazhdojë të jetë pjesë e përplasjes politike, me opozitën që kërkon llogaridhënie për kontratën e vitit 2024 dhe me Rizvanollin që tashmë po e vendos debatin në kontekstin e vendimeve të marra edhe nga qeveritë e mëparshme.