Rexhep Rushiti nga Shkupi shpallet Kampion i Ballkanit në karate në Stamboll

Stamboll, Turqi – Karateja e Maqedonisë së Veriut ka shkëlqyer në arenën ndërkombëtare, duke sjellë një sukses të madh nga Kampionati Ballkanik i zhvilluar në Stamboll të Turqisë. Karateisti Rexhep Rushiti është shpallur Kampion i Ballkanit në kategorinë U21 -84kg, duke përfaqësuar denjësisht Maqedoninë e Veriut dhe duke rrëmbyer vendin e parë dhe medaljen e artë.

Ky sukses i jashtëzakonshëm vjen si kurorëzim i punës, përkushtimit dhe sakrificës së madhe të treguar gjatë procesit stërvitor dhe në vetë garën. Klubi i tij, KK “Kushtrimi” nga Hasanbegu, ka ndarë lajmin me krenari të madhe, duke i dërguar urimet më të ngrohta kampionit dhe duke theksuar se ai i bëri të gjithë krenarë, me urimet për suksese edhe më të mëdha në të ardhmen. (INA)