Presidentja aktuale e Bullgarisë udhëheq pas raundit të parë të zgjedhjeve presidenciale

Presidentja aktuale e Bullgarisë, Iliana Jotova, po udhëheq pas raundit të parë të zgjedhjeve presidenciale të mbajtura sot.

Sipas të dhënave nga disa sondazhe të opinionit të zhvilluara për mediat bullgare, Jotova ka fituar mes 35 dhe 36.5 për qind të votave, përcjell INA.

Në raundin e dytë, i cili mbahet javën e ardhshme, ajo do të përballet me Andrej Gjurov, ish-kryeministrin e përkohshëm të mbështetur nga opozita pro-perëndimore, i cili fitoi mes 32.2 dhe 32.5 për qind të votave.

Nëse fiton, Jotova do të jetë gruaja e parë në Bullgari e zgjedhur drejtpërdrejt si presidente. Ajo garon në zgjedhje si kandidate e pavarur, por gëzon mbështetjen e partisë në pushtet “Bullgaria Progresive” të kryeministrit Rumen Radev dhe të Partisë Socialiste, ku ajo e nisi karrierën e saj politike.

Jotova ka qenë zëvendëspresidente e vendit ndërkohë që Radev ishte president (2017–2026), ndërsa detyrën e presidentes e mori në janar të këtij viti, kur ai dha dorëheqjen për të marrë pjesë në zgjedhjet parlamentare të 19 prillit. Në Bullgari, funksioni i presidentit është kryesisht ceremonial. Kreu i shtetit nuk ka kompetenca ekzekutive dhe të gjitha vendimet e rëndësishme duhet të miratohen nga parlamenti, por zgjedhja e drejtpërdrejtë i jep atij autoritet politik.

Presidenti i Bullgarisë zgjidhet në mënyrë të drejtpërdrejtë, për një periudhë pesëvjeçare, dhe askush nuk mund ta ushtrojë këtë detyrë për më shumë se dy mandate.(INA)