Pesë modele ballukesh që e bëjnë fytyrën të duket më e re, pa ndryshuar gjatësinë e flokëve

Nga balluket e lehta që zbulojnë ballin deri tek ato që kornizojnë fytyrën, këto janë pesë modelet që sjellin një pamje moderne, të butë dhe natyrale këtë vjeshtë

Ndonjëherë mjaftojnë vetëm disa lëvizje të gërshërëve për t’i dhënë një pamje krejt të re flokëve. Balluket e formësuara mirë mund të ndryshojnë dukshëm pamjen e një modeli flokësh, të theksojnë sytë, të zbusin tiparet e fytyrës dhe t’u japin flokëve më shumë gjallëri.

Ato janë veçanërisht një zgjedhje e mirë për gratë që dëshirojnë të rifreskojnë pamjen, pa hequr dorë nga gjatësia e flokëve që u pëlqen.

Me kalimin e viteve, flokët shpesh bëhen më të hollë, ndërsa thinjat mund të ndryshojnë strukturën e tyre, duke i bërë më të ashpër ose më të thatë. Prandaj, është e rëndësishme të zgjidhen balluke që nuk kërkojnë shumë kujdes, por që njëkohësisht i japin modelit të flokëve butësi dhe vëllim.

Këtë vjeshtë spikasin pesë modele që ndërthurin elegancën, natyrshmërinë dhe një prekje të hijeshisë franceze.

1. Balluket midi – të lehta dhe moderne

Balluket midi përfundojnë pak mbi vetulla dhe dallohen për strukturën e tyre të lehtë e të ajrosur. Ndryshe nga balluket e dendura dhe të prera në vijë të drejtë, ato bien butësisht mbi ballë, pa e mbuluar tepër fytyrën.

Një shembull është Halle Berry, e cila i kombinon me flokë të shkurtër të modelit bob. Ky kombinim thekson mollëzat dhe krijon një pamje moderne, me një prekje lozonjare.

2. Balluket e krehura anash – femërore dhe praktike

Nëse nuk jeni të sigurta nëse dëshironi balluke klasike, ato të krehura anash janë një fillim i shkëlqyer.

Janë më të gjata, ndërthuren lehtësisht me pjesën tjetër të flokëve dhe duken veçanërisht bukur me flokë paksa të valëzuar. Për më tepër, ndarja e flokëve anash është rikthyer fuqishëm në modë.

Pamela Anderson dëshmon se sa femëror dhe i çlirët mund të duket ky model. Përparësia e tij është se balluket, edhe kur rriten, vazhdojnë të duken bukur dhe nuk kërkojnë vizita të shpeshta te parukierja.

3. Balluket Birkin – elegancë franceze me një prekje lozonjare

Të frymëzuara nga legjendarja Jane Birkin, këto balluke prej dekadash konsiderohen simbol i elegancës së natyrshme franceze.

Këtë vjeshtë ato shfaqen në një variant më të çlirët, me maja paksa të çrregullta dhe strukturë më të theksuar.

Penélope Cruz është një nga gratë e njohura që dëshmon se sa elegante mund të duken këto balluke. Bukuria e tyre qëndron pikërisht te fakti se nuk kanë nevojë të jenë të lëmuara në mënyrë të përkryer. Pak lëvizje natyrale u jep hijeshi të veçantë.

4. Balluket e dendura, por të lehta – për një pamje elegante

Gratë që pëlqejnë balluket më të theksuara nuk kanë pse të heqin dorë prej tyre. E rëndësishme është të shmangin prerjet tepër të rënda dhe të drejta, të cilat mund ta bëjnë fytyrën të duket më e mbyllur.

Monica Bellucci është shembull i një stili me balluke më të plota, që megjithatë ruajnë lehtësinë dhe elegancën.

Majat e formësuara butësisht dhe disa fije më të holla krijojnë një pamje harmonike, që përshtatet si me flokë të gjatë, ashtu edhe me flokë me gjatësi mesatare.

5. Balluket perde – të buta dhe rinore

Balluket e njohura si curtain bangs, të cilat ndahen në mes dhe bien në të dyja anët e fytyrës, vazhdojnë të jenë ndër modelet më të pëlqyera.

Këtë vjeshtë veçanërisht tërheqëse janë variantet e tyre më të shkurtra dhe më të buta.

Laura Dern i mban të ndara lehtë në mes, me fije që kornizojnë butësisht ballin dhe tëmthat.

Ky model krijon përshtypjen e një fytyre më të hapur dhe u jep flokëve lëvizje natyrale.

Balluket perde janë gjithashtu shumë praktike, pasi kombinohen lehtësisht si me flokë të lëshuar, ashtu edhe me flokë të lidhur bisht ose topuz.

Cili model është më i përshtatshëm?

Zgjedhja e ballukeve nuk duhet të varet vetëm nga mosha apo tendencat e modës. Forma e fytyrës, dendësia e flokëve, struktura e tyre dhe koha që dëshironi t'i kushtoni stilimit janë po aq të rëndësishme.

Në fund, modeli më i bukur është ai që nxjerr në pah tiparet tuaja natyrale dhe ju bën të ndiheni mirë me pamjen tuaj. /Telegrafi/