TË FUNDIT

Pa rrymë gjatë testit me studentët, Bajrami: Fotografia nuk është e pasluftës, është e sotme

Deputetja e Lidhjes Demokratike të Kosovës (LDK), Hykmete Bajrami, ka kritikuar situatën me furnizimin me energji elektrike në vend, duke treguar se si ndërprerja e rrymës të mërkurën mbrëma e detyroi të ndryshonte mënyrën e mbajtjes së testit me studentët e nivelit master në Fakultetin Ekonomik.

Përmes një postimi, Bajrami ka bërë të ditur se rryma u ndërpre rreth orës 17:10, derisa po mbante test me studentët.

Ajo ka treguar se paraprakisht ua kishte marrë telefonat studentëve, por pas disa minutash pritjeje, ata gjetën një zgjidhje kreative për të vazhduar testin.

“Studentët erdhën me një ide kreative: t'ua shpërndaja telefonat në mënyrë të rastësishme, që secili ta përdorte telefonin e dikujt tjetër vetëm për ndriçim, pa e zhbllokuar. Kështu vazhduam testin!”, ka shkruar Bajrami.

Deputetja e LDK-së ka publikuar edhe një fotografi nga momenti, duke ironizuar me situatën e krijuar dhe me atë që e quajti “Kosova e progresit të paparë”.

“Jo, fotografia nuk është e pasluftës. Është bërë para një ore, më 18 nëntor 2026, në ‘Kosovën e progresit të paparë’”, ka shkruar ajo.

Përtej ironisë, Bajrami ka kërkuar nga Qeveria që të paraqitet urgjentisht në Kuvend me një plan konkret për krijimin e kapaciteteve të reja gjeneruese të energjisë elektrike.

Sipas saj, vetëm rritja e prodhimit vendor mund ta nxjerrë vendin nga kriza energjetike.

Ajo ka kritikuar gjithashtu gati gjashtë vjet, siç u shpreh, të humbura pa veprime të mjaftueshme në këtë drejtim, duke paralajmëruar se, nëse nuk ndërmerren masa tani, qytetarët dhe vetë Qeveria së shpejti mund të përballen me vështirësi për të përballuar faturat e energjisë elektrike.

Bajrami ka paralajmëruar se reduktimet e rrymës mund të bëhen pjesë e përditshmërisë nëse nuk sigurohen kapacitete të reja prodhuese.

Leave a Reply

Your email address will not be published. Required fields are marked *