Nënshkruhet kontrata për rehabilitimin e rrugës Skënderaj – Klinë e Epërme, investimi mbi 751 mijë euro

Ministri i Infrastrukturës dhe Transportit, Dimal Basha, ka njoftuar se është nënshkruar kontrata për rehabilitimin e rrugës rajonale R102, në segmentin Skënderaj – Klinë e Epërme.

Sipas Bashës, projekti përfshin rehabilitimin e një segmenti rrugor me gjatësi prej 1.8 kilometrash, ndërsa vlera e investimit është 751 mijë e 570 euro e 95 centë.

Ministri ka bërë të ditur se dëmtimet e kësaj rruge u kanë shkaktuar vështirësi të vazhdueshme banorëve, duke theksuar se rehabilitimi synon të rrisë sigurinë në trafik dhe të përmirësojë kushtet për të gjithë pjesëmarrësit në komunikacion.

Afati i paraparë për përfundimin e punimeve është 35 ditë kalendarike. Sipas Bashës, do të angazhohen që punimet të realizohen me cilësi dhe brenda afatit të përcaktuar në kontratë.

Përmes këtij investimi synohet përmirësimi i infrastrukturës rrugore dhe lehtësimi i qarkullimit për banorët e kësaj zone. /Telegrafi/