“Mos e legjitimoni Gjykatën Speciale”, Feraj me mesazh të fortë

Analisti politik Hysamedin Feraj ka kritikuar thirrjet për protesta dhe armatosje në lidhje me Gjykatën Speciale, duke thënë se ato mund të shërbejnë si argument për legjitimitetin e krijimit të saj.

Feraj theksoi se emocionet nuk janë argument dhe se retorika për dhunë mund të dëmtojë më tej kauzën e kundërshtarëve të Gjykatës Speciale.

Postimi i plotë:

Mos e legjitimoni krijimin e Gjykatës Speciale!

SHBA nuk e njeh as Gjykatën Ndërkombëtare të Drejtësisë, mes tjerash, sepse ushtarët e saj që mund të kenë kryer, gjatë ose mbas lufte vrasje, që mund te cilësohen si krime, hetohen dhe dënohen nga gjykata e vetë SHBA-ve. Raste ka shumë, pa e zhvlerësuar luftën e SHBA-ve. Shumë shtete veprojnë në këtë menyrë.

Një argument për krijimin e Gjykatës Speciale, siç u krijua, ka qenë se brenda Kosovës, nga prokurorë dhe gjykatës vendor nuk do të mund as te hetoheshin as të ndëshkoheshin persona, anëtarë të UÇK-së që sipas Konventave ndërkombëtare mund të kishin kryer vrasje që konsiderohen krime.

Tani me thirrjet për kalljen e gjithë Kosovës, për armatosjen e popullit etj., duket se po e vërtetojnë atë dyshim dhe argument.

– Nëse janë të gatshëm të kallin Kosovën apo të përdorin armët, sa do ta kishin më të lehtë të kallin prokurorët e gjykatësit apo t’i vrasin ata që mund të hetonin apo të jepnin dënime ndaj personave, akuza ndaj të cilëve nga gjykata do të vlerësohej si e vërtetuar?

Me këtë argument, mes të tjerësh, Gjykata është vendosur jashtë Kosovës. Tani po duket a thua se duan ta vërtetojnë drejtësinë e këtij vendimi!

Ja disa pyetje:

– Do ta kallin krejt Kosovën apo një pjesë të saj? – Do t’i djegin pyjet apo edhe qytetet e fshatrat? Do t’i kallin me gjithë banorët apo mbasi këta t’i kenë nxjerrë nga shtëpitë?

– Kundër kujt do t’i zbraz armët i gjothë populli i armatosur i Kosovës? Brenda Kosovës kundër atyre që krijuan Gjykatën Speciale, apo do të marshojnë me armë deri në Hagë ku do të vrasin prokurorët e gjykatësit, apo madje edhe avokatët e të akuzuarve?

– Apo të gjitha këto fjalë të mëdha janë vetëm mënyra të dëshpruara për mbulimin e fajit të vet si krijues të asaj gjykate dhe si furnizues me argumente se duhej krijuar siç i krijua: nga Kosova, por larg këtyre themeluesve?

Shkurt, emocionet nuk janë argument por dëmtojnë argumente.