Kërçovari nga Zvicra Dr. Sulejman Vejseli antarë i Institutit për Avancim Kombëtar

Dr. Sulejman Vejseli, me origjinë nga Kërçova, është profesionist me përvojë të gjerë në teknologjinë e informacionit dhe sektorin bankar. Veprimtaria e tij ndërthur ekspertizën teknike, këshillimin strategjik dhe kërkimin shkencor, me fokus në inovacionin teknologjik dhe transformimin digjital të bankave. Gjatë karrierës së tij, ai ka mbajtur pozicione të ndryshme, përfshirë ato të drejtuesit teknik, zëvendësdrejtuesit të IT-së, menaxherit të aplikacioneve, programuesit dhe konsulentit të teknologjisë së informacionit.

Ai është gjithashtu bashkëthemelues dhe drejtor i strategjisë (Chief Strategy Officer – CSO) në një sipërmarrje teknologjike që zhvillon një platformë ndërkufitare për tregtimin e titujve financiarë të tokenizuar (security tokens), të mbështetur në teknologjinë blockchain. Aktualisht, Dr. Vejseli punon si menaxher në një kompani konsulence në Zvicër, ku këshillon banka për çështje të teknologjisë së informacionit dhe zhvillimit strategjik.

Formimin e tij akademik e ka ndërtuar mbi një diplomë master në shkencat ekonomike nga Universiteti i Cyrihut. Më pas, ka përfunduar doktoraturën (PhD) në shkencat kompjuterike dhe inxhinierike në University of the West of Scotland (UWS), në bashkëpunim me Universitetin e Reutlingenit në Gjermani.

Krahas angazhimit profesional, ai është kërkues pasdoktoral në Research Lab for Digital Business, pranë Qendrës Herman Hollerith të Universitetit të Reutlingenit.

Veprimtaria e tij shkencore përqendrohet në transformimin digjital të bankave, me vëmendje të veçantë ndaj qasjeve të reja në qeverisjen e teknologjisë së informacionit (IT Governance). Ai studion ndërthurjen e strategjive të inovacionit agil me kornizat e qeverisjes, duke shqyrtuar mënyrat se si institucionet bankare mund të përshtaten me zhvillimet teknologjike.

Punimet e tij kërkimore janë publikuar në kuadër të konferencave të njohura ndërkombëtare, si ECIS, HICSS dhe PACIS./kercova.net