Hapet “DHL Express” në qendër të Mitrovicës Veriore, sinjal i ri i normalizimit dhe zhvillimit ekonomik në veri të vendit (VIDEO)

Në vazhdën e hapjes së bizneseve të reja legale dhe zgjerimit të shërbimeve për qytetarët në veri të Kosovës, sot në qendër të Mitrovicës së Veriut është përuruar pika e re e postës ndërkombëtare “DHL Express”, duke shënuar një tjetër hap drejt integrimit ekonomik dhe përmirësimit të klimës së biznesit në këtë pjesë të vendit.

Në ceremoninë e hapjes morën pjesë ministrja e Industrisë, Ndërmarrësisë dhe Tregtisë, Mimoza Kusari , ministri për Komunitete dhe Kthim, N enad Rashiq, si dhe Besnik Vasolli drejtor ekzekutiv i Odës Ekonomike Gjermano-Kosovare.

Hapja e pikës së re të DHL Express konsiderohet si një tregues pozitiv i rritjes së besimit të bizneseve në tregun e veriut dhe i krijimit të kushteve më të favorshme për aktivitet ekonomik të ligjshëm. Shërbimi i ri do t’u mundësojë qytetarëve dhe kompanive qasje më të shpejtë në rrjetin ndërkombëtar të transportit dhe dërgesave, duke lehtësuar lidhjet tregtare me partnerë brenda dhe jashtë vendit.

Zhvillimi vjen në një periudhë kur situata në veri të Kosovës po shfaq shenja të vazhdueshme stabilizimi, me rritje të pranisë së aktiviteteve ekonomike formale dhe regjistrim të bizneseve të reja që operojnë në kuadër të sistemit ligjor të Republikës së Kosovës.

Pjesëmarrësit në ceremoni theksuan se investime të tilla jo vetëm që krijojnë mundësi të reja për zhvillim ekonomik, por edhe kontribuojnë në forcimin e bashkëpunimit ndërmjet komuniteteve dhe në rritjen e perspektivës për zhvillim afatgjatë në veri të vendit.

Me hapjen e kësaj pike, qytetarët e Mitrovicës së Veriut do të kenë qasje direkte në shërbimet e një prej kompanive më të njohura globale të logjistikës dhe transportit ekspres, duke zgjeruar mundësitë për komunikim dhe tregti ndërkombëtare.