Gjykata urdhëron administratën Trump të rikthejë lotarinë e Green Card
Një gjykatë federale në San Diego ka urdhëruar administratën e presidentit amerikan, Donald Trump, të rikthejë procesin e regjistrimit për lotarinë e vizave të diversitetit për vitin 2027, e njohur si lotaria e Green Card.
Lotaria duhet të hapet deri më 18 tetor, ndërsa regjistrimi do të vazhdojë deri më 19 nëntor, vendosi të mërkurën gjyqtarja Jinsook Ohta, nga Gjykata e Qarkut e SHBA-së për Distriktin Jugor të Kalifornisë. Ajo nxori një urdhër paraprak gjyqësor që pezullon vendimin për ndërprerjen e programit të Green Card-it.
Programi mundëson dhënien e lejeve të qëndrimit të përhershëm për deri në 55 mijë aplikantë çdo vit, nga vende që historikisht kanë pasur nivele më të ulëta të emigrimit drejt SHBA-së. Një pjesë e madhe e përfituesve vijnë nga vendet afrikane.
Administrata e presidentit Donald Trump e pezulloi programin dhjetorin e kaluar, pasi një shtetas portugez, i cili kishte përfituar vizë përmes kësaj lotarie, u dyshua për vrasjen e katër personave në dy sulme të ndara me armë zjarri në Rhode Island dhe Massachusetts. I dyshuari më vonë u gjet i vdekur, pasi kishte kryer vetëvrasje.
Në mars, administrata nxori një rregull të ri, sipas të cilit aplikantët duhet të kenë pasaportë për të marrë pjesë në program, raporton bloomberg .
Firma ligjore për çështje të emigracionit, Red Eagle Law LC, me seli në Kaliforni, ngriti padi kundër Departamentit të Shtetit, duke kërkuar rifillimin e programit. Më herët, gjyqtarja Ohta kishte refuzuar kërkesën e firmës për një urdhër të përkohshëm kufizues.
Muajin e kaluar, një gjyqtar i Distriktit Verior të Kalifornisë konstatoi se Departamenti i Shtetit kishte rifilluar shqyrtimin e aplikimeve për vitin fiskal 2026 me një ritëm jashtëzakonisht të ngadaltë, të cilin e përshkroi si të paprecedentë.
Lotaria e vizave të diversitetit u krijua me ligj në vitin 1990. Megjithatë, përzgjedhja në lotari nuk garanton automatikisht marrjen e Green Card-it, pasi kandidatët duhet të plotësojnë edhe kushtet e tjera ligjore për emigrim në SHBA.
Trump e ka kundërshtuar prej kohësh këtë program, por vendimi i fundit gjyqësor e detyron administratën e tij të ndërmarrë hapa për rikthimin e procesit të aplikimit për vitin 2027. /Telegrafi/
