“Fol me Kryeministrin”/ Rama prezanton platformën e re të komunikimi me qytetarët

Kryeministri Edi Rama ka njoftuar nisjen e funksionimit të platformës digjitale “Fol me Kryeministrin”, një hapësirë e re që synon të mundësojë komunikimin e drejtpërdrejtë mes tij, studentëve dhe qytetarëve të interesuar.

Përmes një postimi në rrjetet sociale, kreu i qeverisë bëri të ditur se platforma është tashmë aktive dhe do të jetë e aksesueshme në çdo moment të ditës, duke u ofruar përdoruesve mundësinë për të ndarë mendime, shqetësime dhe sugjerime.

Prezantimi i platformës vjen pas protestave dhe tensioneve të fundit me studentët, në një periudhë kur dialogu mes tyre dhe institucioneve është rikthyer në vëmendje.

Kryeministri u ka bërë thirrje studentëve, por edhe qytetarëve të tjerë, që ta përdorin këtë kanal të ri për të shprehur pikëpamjet dhe për të ngritur çështjet që i shqetësojnë.