Endrit Brajshori shkëlqen në OKTAGON, shqiptari e mposht kundërshtarin me nokaut në raundit e parë

Luftëtari shqiptar i arteve marciale mikse (MMA), Endrit Brajshori, ka regjistruar një tjetër fitore të rëndësishme në karrierën e tij, duke triumfuar në eventin OKTAGON 96, të zhvilluar të shtunën në Munih të Gjermanisë.

Brajshori u përball me gjermanin Christian Mach në kategorinë Welterweight (77 kg), në një duel ku shqiptari arriti të tregojë epërsinë që në rundin e parë.

Ai e dominoi kundërshtarin me goditje të fuqishme, derisa në minutën 4:38 të rundit të parë gjyqtari ndërhyri për ta ndërprerë përballjen, duke ia dhënë fitoren Brajshorit me nokaut teknik (TKO).

Endrit Brajshori mocnym ground and pound kończy Christiana Macha podczas #OKTAGON96❗️🚨 https://t.co/uqA2eNq4m9 — Czas na MMA (@CzasNaMMA) October 31, 2026

Nga fillimet në MMA deri te skena evropiane

Brajshori ka ndërtuar karrierën e tij në Gjermani, ku prej vitesh është i angazhuar në sportin e arteve marciale mikse.

Ai stërvitet në klubin Martial Arts Academy Rosenheim, nën drejtimin e trajnerit Refiq Salihi, ndërsa ka më shumë se dhjetë vjet përvojë në këtë sport.

I njohur edhe me pseudonimin “AK 47”, shqiptari garon në kategorinë Welterweight, ku ka arritur të krijojë emër përmes paraqitjeve në skenën evropiane të MMA-së.

Tri fitore radhazi dhe bilanc pozitiv

Fitorja ndaj Christian Mach ishte e treta radhazi për Brajshorin në organizatën OKTAGON, pas triumfeve ndaj Jan Malach dhe Petr Bartonek.

Me këtë rezultat, ai e çon bilancin e karrierës profesionale në shtatë fitore dhe dy humbje.

Nga shtatë triumfet e tij, katër kanë ardhur me nokaut ose nokaut teknik, dy me dorëzim dhe një me vendim të gjyqtarëve.

Në moshën 29-vjeçare, Brajshori vazhdon të ndërtojë karrierën në një prej organizatave më të njohura evropiane të MMA-së, duke synuar rezultate edhe më të mëdha në vazhdim. /Telegrafi/