TË FUNDIT

Dy substanca të njohura mund ta mbrojnë mëlçinë nga pesticidet: Çfarë tregoi studimi?

Një eksperiment tregoi se kombinimi i tyre mund të zvogëlojë dëmtimet toksike të mëlçisë. Por rezultatet kanë një kufizim të rëndësishëm që nuk lejon ende nxjerrjen e përfundimeve për njerëzit

Melatonina dhe vitamina E mund të luajnë rol të rëndësishëm në mbrojtjen e mëlçisë nga dëmtimet e shkaktuara nga ekspozimi ndaj insekticideve që përdoren në bujqësi.

Në këtë përfundim kanë arritur shkencëtarët në Turqi, pas një eksperimenti në të cilin kanë studiuar ndikimin e këtyre dy substancave në ndryshimet e shkaktuara në mëlçi nga acetamipridi , një insekticid që përdoret për kontrollin e dëmtuesve në kulturat bujqësore.

Eksperimenti te minjtë tregoi rezultate pozitive

Studiuesit zbuluan se melatonina dhe vitamina E mund të zvogëlojnë dëmtimet e mëlçisë pas ekspozimit ndaj acetamipridit. Megjithatë, hulumtimi është kryer vetëm te minjtë , prandaj rezultatet nuk mund të zbatohen drejtpërdrejt te njerëzit.

Gjatë eksperimentit, pas ekspozimit ndaj insekticidit, te kafshët u regjistruan nivele të rritura të enzimave të mëlçisë, përkatësisht ALT, AST dhe ALP, si dhe një rritje e stresit oksidativ.

Në indet e mëlçisë u vërejtën gjithashtu ndryshime patologjike, përfshirë inflamacionin, nekrozën dhe shenja të fibrozës.

Kur minjve iu administruan melatonina dhe vitamina E, ndryshimet e dëmshme ishin më pak të theksuara . Kombinimi i këtyre dy substancave tregoi efektin më të favorshëm: treguesit biokimikë iu afruan vlerave normale, ndërsa dëmtimet e indeve të mëlçisë ishin më të lehta.

Sipas studiuesve, ky efekt mund të lidhet me vetitë antioksiduese të melatoninës dhe vitaminës E, të cilat ndihmojnë në zvogëlimin e stresit oksidativ të shkaktuar nga ekspozimi ndaj acetamipridit.

Megjithatë, ekspertët theksojnë se rezultatet te kafshët nuk dëshmojnë se i njëjti efekt mbrojtës ekziston edhe te njerëzit . Për këtë nevojiten studime të mëtejshme klinike.

Prandaj, këto gjetje nuk përbëjnë rekomandim për përdorimin e melatoninës apo vitaminës E si mbrojtje nga pesticidet. Mënyra kryesore e parandalimit të dëmtimeve mbetet kufizimi i ekspozimit dhe respektimi i masave të sigurisë gjatë përdorimit të insekticideve. /Telegrafi/

Leave a Reply

Your email address will not be published. Required fields are marked *