Detaje të reja nga tragjedia në Gjilan – arrestohet 65-vjeçari, dyshohet për vrasjen e djalit dhe foshnjës

Policia e Kosovës ka dhënë detaje të reja lidhur me rastin e rëndë në fshatin Demiraj të Gjilanit, ku u gjetën pa shenja jete një 27-vjeçar dhe një foshnjë tre muajshe.

Lajmin për Telegrafin e ka konfirmuar zëdhënësi i Policisë për rajonin e Gjilanit, Ismet Hashani.

Sipas Policisë, nga hetimet e para dyshohet se ngjarja ka ndodhur brenda familjes, ndërsa si i dyshuar është arrestuar babai i viktimës, 65-vjeçar.

“Me vendim të prokurorit, i dyshuari është ndaluar për 48 orë”, bëhet e ditur në njoftimin e Policisë.

Rasti u raportuar sot më 1 nëntor 2026, rreth orës 08:47, kur Policia kishte pranuar informacion se në një shtëpi në fshatin Demiraj dyshohej për dy persona të pajetë.

Në vendin e ngjarjes kishin dalë njësitet policore, Prokurori i Shtetit dhe ekipi emergjent mjekësor, ku ishte konstatuar vdekja e të dy personave.

Me vendim të Prokurorit të Shtetit, trupat e pajetë janë dërguar në Institutin e Mjekësisë Ligjore në Prishtinë për obduksion.

Policia ka bërë të ditur se, në bashkëpunim me Prokurorinë, po vazhdon hetimet për ndriçimin dhe sqarimin e plotë të rrethanave të rastit, i cili tashmë është cilësuar si “Vrasje e rëndë”.

Hetimet për këtë ngjarje janë në vazhdim. /Telegrafi/