Çfarë ndodh në organizëm kur hamë shumë hudhër? Këta persona duhet të kenë kujdes

Nga shqetësimet e tretjes deri te ndikimi në mpiksjen e gjakut, hudhra mund të shkaktojë efekte të padëshiruara, veçanërisht te personat që përdorin barna të caktuara

Hudhra është një nga ushqimet më të njohura për vetitë e saj të dobishme. Përdoret për t'u dhënë shije gatimeve, por edhe si pjesë e mjekësisë tradicionale. Megjithatë, konsumimi i tepërt mund të shkaktojë probleme shëndetësore, sidomos te personat me tretje të ndjeshme ose që përdorin barna kundër mpiksjes së gjakut.

Hudhra (Allium sativum) përmban komponime squfuri, përfshirë alicinën, e cila formohet kur thelbi shtypet ose pritet. Këto substanca lidhen me një pjesë të efekteve biologjike të hudhrës.

Studimet tregojnë se preparatet e hudhrës mund të ndihmojnë në uljen e lehtë të tensionit arterial dhe kolesterolit te disa persona. Megjithatë, ajo nuk mund t'i zëvendësojë barnat dhe konsumimi në sasi të mëdha nuk sjell domosdoshmërisht përfitime më të mëdha.

Çfarë ndodh me tretjen kur konsumojmë shumë hudhër?

Pasojat më të zakonshme lidhen me sistemin tretës. Konsumimi i tepërt mund të shkaktojë dhimbje barku, fryrje, gazra, të përziera dhe ndonjëherë diarre.

Hudhra përmban fruktane, karbohidrate që përthithen dobët në zorrën e hollë. Kur arrijnë në zorrën e trashë, bakteret i fermentojnë duke prodhuar gazra.

Për këtë arsye, personat me sindromën e zorrës së irrituar mund të përjetojnë shqetësime më të theksuara, veçanërisht pas konsumimit të hudhrës së papërpunuar.

Edhe te personat me refluks gastroezofageal, hudhra mund të përkeqësojë urthin dhe ndjesinë e djegies në stomak.

A e hollon vërtet hudhra gjakun?

Një nga vetitë më të diskutuara të hudhrës është ndikimi i saj në mpiksjen e gjakut.

Sipas Institutit Linus Pauling të Universitetit Shtetëror të Oregonit , disa përbërës të hudhrës mund të zvogëlojnë grumbullimin e trombociteve, qelizave që marrin pjesë në formimin e mpiksjeve.

Megjithatë, kjo nuk do të thotë se hudhra e hollon gjakun në kuptimin e drejtpërdrejtë.

Dallimi kryesor qëndron ndërmjet hudhrës së përdorur në ushqim dhe suplementeve të përqendruara, të cilat mund të kenë ndikim më të madh në funksionin e trombociteve dhe rrezikun e gjakderdhjes.

Kush duhet të tregojë kujdes të veçantë?

Kujdesi është veçanërisht i rëndësishëm për personat që përdorin barna antikoagulante ose antiagregante, si varfarina, apiksabani, rivaroksabani, aspirina dhe klopidogreli.

Kjo nuk nënkupton përjashtimin e hudhrës nga ushqimi. Sasitë e zakonshme në gatime përgjithësisht tolerohen mirë, por suplementet dhe konsumimi i sasive të mëdha kërkojnë këshillim me mjekun.

Kujdes rekomandohet edhe përpara ndërhyrjeve kirurgjikale, pasi suplementet e hudhrës mund të rrisin rrezikun e gjakderdhjes.

Pse aroma e hudhrës ndihet edhe përmes lëkurës?

Pas tretjes, disa komponime squfuri kalojnë në qarkullimin e gjakut dhe eliminohen përmes mushkërive dhe lëkurës.

Njëri prej tyre, sulfidi alil-metil, është përgjegjës për aromën karakteristike që mund të vazhdojë për orë të tëra, edhe pas larjes së dhëmbëve.

Nuk ekziston një kufi universal. Toleranca varet nga gjendja shëndetësore, ndjeshmëria individuale, mënyra e përgatitjes dhe barnat që përdoren.

Nëse konsumimi shkakton vazhdimisht urth, fryrje, dhimbje barku ose të përziera, këshillohet zvogëlimi i sasisë.

Hudhra mund të jetë pjesë e një ushqyerjeje të shëndetshme, por përfitimi nuk qëndron te konsumimi sa më i madh, por te përdorimi i moderuar dhe i përshtatur me gjendjen shëndetësore. /Telegrafi/