TË FUNDIT

Çka po ndodh në Ohër? Zëdhënësi i BE-së: Takimi Kurti – Vuçiq mund të përfundojë në mbrëmje

Zëdhënësi i Bashkimit Evropian, Peter Stano nuk ka dhënë detaje për takimin ndërmjet kryeministrit të Kosovës, Albin Kurti dhe presidentit serb, Aleksandar Vuçiq, që po mbahet sot në Ohër të Maqedonisë së Veriut .
Në një konferencë për medie, ai tha se takimi Kurti-Vuçiq ndoshta mund të përfundojë në mbrëmje.

Ai tha se pas takimit, shefi i politikës së jashtme të BE-së, Josep Borrell do të dalë para gazetarëve.

Ndryshe, në Ohër të Maqedonisë së Veriut, kryeministri i Kosovës, Albin Kurti dhe presidenti serb, Aleksandër Vuçiq do të diskutojnë për planin e Bashkimit Evropian për dialogun dhe zbatimin e tij.

Nis më në fund takimi mes Kurtit e Vuçiqit

Ka nisur takimi i përbashkët mes kryeministrit të Kosovës, Albin Kurti, presidentit serb, Aleksander Vuçiq si dhe ndërmjetësuesve të BE-së, Miroslav Lajçak e Joseph Borrell.
Takimi trilateral vjen pasi edhe Kurti edhe Vuçiq patën takime të ndara me ndërmjetësuesit evropianë, shkruan lajmi.net.

Në takimin trilateral, mirëpo edhe në ato paraprake, tema kryesore në agjendë është diskutimi për zbatimin e propozimit të BE-së për normalizimin e marrëdhënieve Kosovë – Serbi.

Në vendin po mbahet takimi është emisari i SHBA-ve për Ballkanin, Gabriel Escobar.

Zëdhënësi i BE-së, Peter Stano, ka thënë se takimi mes Kurtit e Vuçiqit mund të zgjas deri në orët e mbrëmjes.

Pas takimit pritet të ketë deklaratë për media nga Borrell, dhe veçmas nga Kurti e Vuçiq. /Lajmi.net/

Në ditën që Kurti po dialogon në Ohër, krerët e UÇK-së pranojnë në vizitë një figurë publike

Në ditën kur Kurti po dialogon me Vuçiqin në Ohër, krerët e UÇK-së në Hagë kanë pranuar një vizitë.
Për t’i parë ata, ka shkuar kryetari i Mitrovicës, Bedri Hamza, shkruan lajmi.net.

Këtë e ka bërë të ditur vet Hamza përmes një postimi në Facebook.

“Sot përfundova vizitën time në Hagë ku takova Hashimin, Kadriun, Bacin Jakup e Rexhën. Ata si gjithmonë me moral të lartë e atdhedashuri të palëkundur!”, ka shkruar Hamza. /Lajmi.net/

Vritet me armë zjarri një person në Prishtinë, dy të tjerë plagosen nga një mjet i mprehtë

Një person është vrarë nga arma e zjarrit në Prishtinë.
Siç ka konfirmuar Policia e Kosovës, rasti ka ndodhur në lagjen “Dragodan” të kryeqytetit, shkruan lajmi.net.

Nga Policia e Kosovës kanë bërë me dije gjithashtu se rasti ka ndodhur në një hotel dhe se edhe dy persona kanë përfunduar të plagosur nga një mjet i mprehtë.

“Sot rreth orës 13:20 policia ka marrë informatën për të shtëna me armë zjarri, në lagjen Arbëria të Prishtinës, saktësisht në një hotel. Menjëherë në vendin e ngjarjes kanë dalë njësitet e nevojshme policore dhe ekipi mjekësor. Bazuar në të dhënat fillestare nga arma e zjarrit lëndime ka pësuar një person, i cili në vendngjarje ka ndërruar jetë, vdekjen e tij e ka konstatuar ekipi mjekësor. Ndërsa dy persona të tjerë të lënduar(dyshohet me mjet të mprehtë) janë dërguar për tretman mjekësor. Aktualisht hetuesit policor, në koordinim me prokurorin e shtetit janë duke punuar ..

Gazetari i BBC “vë bast” 10 euro: Takimi Kurti – Vuçiq nuk do rezultojë me marrëveshje

Gazetari i BBC-së, Guy De Launey i ka vënë në mënyrë sarkastike bast 10 euro se nuk do të ket marrëveshje sot mes Kosovës dhe Serbisë.
“Po vë bast se takimi i shumëpritur i sotëm mes liderëve të Kosovës dhe Serbisë nuk do të rezultojë në marrëveshje.” – ka shkruar ai derisa shihet në fotografi teksa mban një kartmonedhë 10-euroshe.

Gazetari i BBC-së Guy De Launey që po qëndron në Ohër ka bërë një koment edhe për opozitën në Kosovë dhe atë në Serbi.

“Escobari po flet për fundin e vitit si kohën për ta përmbyllur (marrëveshjen). Prandaj, ka shumë hapa prej tash deri në atë kohë. Por, opozita edhe në Kosovë e edhe në Serbi ka qenë goxha e butë deri tash. Të lodhur, apo po e ruajnë barutin?” – shkruan z. De Launey në profilin e tij në Twitter.

Bahtiri paralajmërim Kurtit: Nuk do të më ketë më përkrahës nëse nënshkruan Asociacionin

Ish-kryetari i Komunës së Mitrovicës, Agim Bahtiri, i ka dërguar porosi kryeministrit Albin Kurti, duke i thënë se s’do ta mbështesë nëse nënshkruan krijimin e Asociacionit të komunave me shumicë serbe.
Në një intervistë për T7, Bahtiri ka thënë se do ta përkrah Kurtin deri në momentin kur ai nënshkruan diçka që është në kundërshtim me deklaratat që ka thënë më herët

“Po shpresoj shumë, duke e njohtë edhe z.Kurti që ka njohuri të duhur dhe e dinë se çka është t’u ba, për arsye se ai duhet ta dinë se këtu në Mitrovicë i ka marrë 65 përqind të votave kundër Asociacionit të komunave dhe më ka pas përkrahës të fuqishëm dhe do të më ketë përkrahës të fuqishëm deri në momentin që ai që mund të nënshkruajë dicka kundër asaj që ka fol, atëherë nuk do të më ka përkrahës asnjëherë, për arsye se unë e di qëllimin e Serbisë”, ka deklaruar Bahtiri.

Zhvillime dramatike, Trump: Do të arrestohem të martën, protestoni

Ish-presidenti amerikan, Donald Trump, ka thënë se pret të arrestohet të martën, bazuar, sipas tij, në një rast të trajtuar nga Zyra e Prokurorit në qarkun e Manhatanit.
Ai e ka bërë këtë deklaratë në rrjetin e tij social, Truth Social, të shtunën.

“Kandidati favorit i republikanëve dhe ish-presidenti i Shteteve të Bashkuara do të arrestohet të martën e javës së ardhshme. Protestoni, rikthejeni kombin tonë sërish”.

Zëdhënësi i Zyrës së Prokurorit për qarkun e Manhatanit, nuk u është përgjigjur kërkesave për koment, raporton REL.

Trump ka thënë, pa ofruar dëshmi, se “rrjedhjet ilegale”, nga Zyra e Prokurorit të Mantahanit, kanë dhënë shenja se ai do të arrestohet.

Ende nuk është bërë e ditur se për çka mund të akuzohet ai.