Ben Affleck: Frika nga Inteligjenca artificiale është propagandë e pastër – nuk do të shkatërrojë vende pune

Ben Affleck beson se frika për humbjen e vendeve të punës dhe kërcënimet ndaj njerëzimit që i atribuohen inteligjencës artificiale janë kryesisht propagandë.

Aktori dhe skenaristi amerikan mendon se njerëzit, sapo fillojnë ta përdorin inteligjencën artificiale, kuptojnë se ajo mund të jetë një mjet i dobishëm dhe jo domosdoshmërisht një kërcënim.

“Kur ajo të mos jetë më ky i huaj i mjegullt, abstrakt dhe i frikshëm – ‘do të na vrasë të gjithëve, do të shkatërrojë gjysmën e vendeve të punës në zyra, gjithë kjo propagandë’ – dhe kur njerëzit ta shohin realisht se çfarë është, do të kuptojnë se është thjesht një formë tjetër e teknologjisë kompjuterike, një mjet dhe një hap përpara në aspektin teknologjik”, ka deklaruar së fundmi Affleck për Bloomberg.

Affleck është një prej mbështetësve më të njohur të teknologjisë së inteligjencës artificiale në industrinë e filmit. Në vitin 2022, ai themeloi “InterPositive”, një startup për prodhimin e filmave të fokusuar në inteligjencën artificiale, i cili, sipas raportimeve, u ble nga Netflix në fillim të këtij viti për 587 milionë dollarë.

Megjithatë, kur u pyet për rolin e inteligjencës artificiale në produksionin e filmit të tij të ri, “Animals”, Affleck nuk preferoi të zbulonte detaje.

“Jam paksa ngurrues të tregoj gjëra të tilla apo të flas fare për to, sepse në punën time përpiqemi të krijojmë një iluzion të realitetit”, ka thënë ai.

Ai e shpjegoi këtë duke e krahasuar me një shfaqje magjie.

“Është njësoj sikur të shkoni në një shfaqje magjie dhe magjistari të dalë në skenë e të thotë: ‘Para se të filloj, dua të dini se këtu ka edhe një lepur tjetër dhe ky person në publik është bashkëpunëtori im’. Në njëfarë mënyre, kjo e prish magjinë”, ka shpjeguar Affleck.

Megjithatë, aktori, pasuria e të cilit vlerësohet në rreth 300 milionë dollarë, nuk është optimist për të gjitha aspektet e inteligjencës artificiale.

Një prej shqetësimeve të tij kryesore lidhet me ndikimin që kjo teknologji mund të ketë në arsim dhe me mundësinë që njerëzit të bëhen tepër të varur prej saj.

“Kur shqetësohem për inteligjencën artificiale, shqetësohem për fëmijët e mi në shkollë. Më shqetëson rritja me 30 për qind e notave maksimale në universitete gjatë tri viteve të fundit”, ka thënë ai. “Më shqetëson pafuqia e mësuar dhe përdorimi me përgjegjësi i saj”.

Pikërisht tensioni mes përdorimit të inteligjencës artificiale si një mjet dhe varësisë së tepërt prej saj është bërë një prej temave kryesore në shumë industri.

Affleck thotë se në Hollywood nuk ka parë që inteligjenca artificiale të përdoret vetëm për “uljen e kostove apo për disa gjëra të tmerrshme”.

Sipas tij, teknologjia mund të plotësojë punën e njerëzve dhe jo domosdoshmërisht t’i zëvendësojë ata.

“Tani po përdoret në filma ku punon i njëjti numër njerëzish dhe, teknikisht, madje po punësohen edhe më shumë njerëz”, ka deklaruar ai.

Megjithatë, komentet e Affleck vijnë në një kohë kur industria e filmit dhe videos ka përjetuar rënie të numrit të vendeve të punës. Sipas të dhënave të Departamentit të Punës në SHBA, kjo industri ka humbur 49 mijë vende pune ndërmjet viteve 2016 dhe 2026, një rënie prej 21 për qind.

Affleck nuk është i vetmi emër në Hollywood që beson se industria duhet ta pranojë inteligjencën artificiale, ndonëse qëndrimet ndryshojnë sa i përket mënyrës së përdorimit dhe rregullimit të saj.

Regjisori James Cameron ka marrë një rol zyrtar në zhvillimin e inteligjencës artificiale në industri dhe në vitin 2024 iu bashkua bordit drejtues të kompanisë “Stability AI”.

Edhe aktorja Natasha Lyonne e ka pranuar përdorimin e kësaj teknologjie, por thekson rëndësinë e mbrojtjes së të drejtave të artistëve. Ajo është bashkëthemeluese e studios “Asteria Film Co.”, e cila synon të zhvillojë inteligjencë artificiale gjenerative që respekton të drejtat e autorit.

Lyonne mendon se Hollywood duhet të marrë pjesë në formësimin e zhvillimit të inteligjencës artificiale dhe jo vetëm të përpiqet t’i rezistojë asaj.

“Nuk mendoj se është e drejtë të vjedhësh lirisht me justifikimin e përshpejtimit teknologjik apo konkurrencës nga Kina. Na duhen njerëz brenda industrisë së inteligjencës artificiale, në mënyrë që të mos përfundojmë duke u drejtuar prej mjeteve”, ka thënë ajo vitin e kaluar.

Me idenë se Hollywood nuk mund ta injorojë revolucionin e inteligjencës artificiale pajtohet edhe aktori Matthew McConaughey.

“Ajo nuk po vjen. Ajo tashmë është këtu”, ka deklaruar ai në shkurt, gjatë një bisede publike për CNN.

Sipas raportimeve, McConaughey ka paraqitur një sërë kërkesash për regjistrimin e markave tregtare që lidhen me imazhin e tij dhe shprehjet karakteristike që përdor, me qëllim që ta bëjë më të vështirë imitimin e paautorizuar të tyre.

“Mos e mohoni”, i ka thënë McConaughey së fundmi aktorit Timothée Chalamet. “Nuk mjafton të qëndrosh mënjanë dhe të moralizosh se kjo është e gabuar. Kjo nuk do të zgjasë shumë”. /Telegrafi/