Zhduken 20 për qind e fëmijëve emigrantë shqiptarë që u strehuan nga një qendër në Angli
Pothuajse 20 për qind e fëmijëve emigrantë nga Shqipëria të pashoqëruar që u morën nga Këshilli i Qarkut Kent në Angli këtë vit, janë zhdukur, zbulon BBC.
Autoriteti vendor strehoi deri më 31 tetor 197 fëmijë shqiptarë, 39 prej të cilëve janë zhdukur.
Ecpat UK, e cila bën fushatë për të mbrojtur fëmijët nga shfrytëzimi, tha se shifrat ishin shumë shqetësuese.
Këshilli tha se kishte punuar ngushtë me Zyrën e Brendshme dhe policinë për të mbrojtur fëmijët e rrezikuar.
Shifrat u morën nga BBC përmes një kërkese për “Lirinë e Informacionit”.
Këshilli tha se 197 fëmijë shqiptarë që u pranuan në Njësinë e Pranimit në Kent të Ministrisë së Brendshme iu nënshtruan kujdesit nga 1 janari deri më 31 tetor.
Siç raportohet, këshilli shtoi se deri më 7 nëntor, 39 ishin regjistruar si të zhdukur. Megjithatë, tha se disa nga ata fëmijë do të kishin mbushur deri atëherë 18 vjeç.
Shifrat e qeverisë të mbledhura nga BBC tregojnë se 44,122 njerëz kanë kaluar me varka të vogla deri më tani këtë vit, krahasuar me 28,461 që mbërritën në vitin 2021.
Kjo kontribuoi në mbipopullimin në qendrën e pranimit Manston në Kent, e cila në një moment mbante më shumë se dyfishin e kapacitetit të saj, me rreth 4,000 njerëz.
