Nis aplikimi për vaksinim falas kundër gripit

Qytetarët nga grupet e rrezikuara mund të aplikojnë për vaksinim falas kundër gripit sezonal, pasi është aktivizuar ueb-faqja vakcinacija.mk, njofton Ministria e Shëndetësisë.

Të interesuarit duhet të plotësojnë formularin online, përmes të cilit regjistrohen drejtpërdrejt në sistemin “Moj Termin”.

Më pas, me mesazh SMS do të njoftohen për datën dhe orën e vaksinimit, në pikën që kanë zgjedhur gjatë aplikimit.

Vaksinimi falas u dedikohet personave mbi 65 vjeç, të sëmurëve kronikë, punonjësve shëndetësorë, grave shtatzëna dhe fëmijëve nga gjashtë muaj deri në pesë vjeç.

Sipas Ministrisë, vaksinimi është masa më efektive për parandalimin e gripit dhe të komplikimeve të rënda që mund të rrezikojnë jetën, veçanërisht te personat më të cenueshëm.