Shkruan Kimete Berisha: Dhelpra shpërndan Fermën
1. Lajmi i Madh
Një mëngjes në fermë u përhap lajmi se duhej zgjedhur Presidenti.
Kafshët nuk e dinin saktësisht pse ishte kaq e rëndësishme, por e dinin një gjë:
çdo zgjedhje e Presidentit në fermë sillte shumë zhurmë dhe shumë heshtje njëkohësisht.
Në mes të oborrit u mblodhën kafshët.
Dallëndyshet filluan të fluturojnë mbi fermë duke bërtitur:
Stabilitet!
Konsensus!
Dinjitet institucional!
Kafshët nuk e kuptonin mirë çfarë do të thoshin këto fjalë, por i duartrokisnin gjithsesi.
…
2. Dhelpra
Nga hija e gardhit doli Dhelpra.
Ajo nuk tha se donte të bëhej Presidente.
Vetëm eci ngadalë nëpër oborr dhe shikoi kafshët me qetësi.
Unë nuk po kandidoj, – tha ajo.
Unë vetëm jam këtu.
Kafshët tundën kokën me respekt.
Sepse në fermë ekzistonte një rregull i pashkruar:
kandidati më serioz është ai që pretendon se nuk është kandidat.
…
3. Derrat Strategë
Në stallën më të madhe jetonin derrët strategë.
Ata rrallë dilnin para kafshëve, por gjithmonë vendosnin për kafshët.
Njëri tha:
Kandidati duhet të jetë i pranueshëm.
Tjetri tha:
Kandidati duhet të jetë i menaxhueshëm.
I treti tha:
Kandidati duhet të jetë i pashmangshëm.
Pastaj të gjithë tundën kokën dhe shpallën:
Kjo është demokraci shumë funksionale.
…
4. Dallëndyshet e Mediave
Dallëndyshet fluturonin mbi fermë dhe përsërisnin çdo gjë që dëgjonin.
Kandidat i unitetit!
Kandidat i stabilitetit!
Kandidat institucional!
Sa më shumë e përsërisnin, aq më shumë kafshët filluan të besonin se kjo ishte e vërtetë.
Sepse në fermë ekzistonte një ligj i thjeshtë:
një fjali bëhet e vërtetë në tokë kur përsëritet mjaftueshëm në ajër.
…
5. Ujku i Opozitës
Në anën tjetër të fermës rrinte Ujku i Opozitës.
Ai ulërinte çdo natë:
Skandal!
Katastrofë!
Fundi i fermës!
Kafshët tundnin kokën seriozisht.
Pastaj vazhdonin të bënin pikërisht atë që kishin vendosur më parë.
…
6. Kali i Stabilitetit
Në mes të gjithë debatit qëndronte Kali i Stabilitetit.
Ai nuk fliste shumë.
Vetëm thoshte herë pas here:
Duhet qetësi.
Kafshët e donin shumë këtë fjali, sepse ishte fjalia e vetme që nuk kërkonte asnjë vendim.
…
7. Derrat që Shkruajnë Historinë
Në fund të çdo debati, derrët mblidheshin në stallë dhe shkruanin historinë e fermës.
Në librat e tyre shkruhej gjithmonë:
“Ferma vendosi me unitet.”
“Ferma vendosi me mençuri.”
“Ferma vendosi me përgjegjësi.”
Askush nuk e dinte saktësisht kush ishte ferma.
Por të gjithë përmendeshin në emër të saj.
…
8. Konsensusi
Një ditë, një pulë e vogël pyeti:
Po kush e vendosi këtë?
Ferma heshti.
Pastaj Gomari filozof tha:
Kjo quhet konsensus.
Po çfarë është konsensusi? – pyeti pula.
Gomari mendoi pak dhe tha:
Konsensusi është kur të gjithë pajtohen me një vendim që është marrë para se të fillojë debati.
…
9. Presidentja e Fermës
Në fund kafshët u mblodhën përsëri në oborr.
Dallëndyshet shpallën lajmin:
Ferma do ta zgjedhë Presidenten!
Dhelpra buzëqeshi qetë.
Sepse ajo e dinte një sekret të fermës:
në fermë nuk fiton ai që bind kafshët.
Fiton ai që i bind kafshët se vendimi ka ardhur vetë.
Por atë mbrëmje ndodhi diçka e pazakontë.
Ferma nuk e zgjodhi Presidenten.
Dallëndyshet u hutuan.
Derrat filluan të shkruajnë një histori tjetër.
…
10. Dhelpra mbi Akull
Të nesërmen në mëngjes Dhelpra doli përsëri në oborr.
Ajo dukej pak e nervozuar.
Kafshët u mblodhën përreth.
Dhelpra ngriti kokën dhe tha:
Ferma shpërndahet.
Kafshët u habitën.
Disa menduan se kjo ishte pjesë e planit.
Disa menduan se kjo ishte pjesë e stabilitetit.
Dhelpra shtoi me krenari:
Ky vendim më bën shumë krenare.
Pastaj tha se ata që e kanë sjellë fermën deri këtu janë të rrezikshëm.
Dhelpra tha se dhelprani është i rrezikshëm.
Dallëndyshi qeshi, sepse në fermë gjithmonë është i rrezikshëm dikush tjetër.
Dhe kështu, për herë të parë në historinë e fermës,
Presidenti nuk u zgjodh.
Por zgjedhjet vazhduan.
…
11. Kafshët që Mësojnë të Duartrokasin
Pas vendimit të Dhelprës, dallëndyshet filluan të fluturojnë mbi fermë me lajmin e madh:
Ferma është e qetë!
Ferma është stabile!
Ferma është krenare!
Kafshët filluan të duartrokasin.
Disa nuk e dinin pse po duartrokisnin.
Disa nuk e dinin për kë po duartrokisnin.
Por në fermë ekzistonte një zakon shumë i dobishëm:
kur të gjithë duartrokasin, është e rrezikshme të mos duartrokasësh.
Gomari filozof nuk duartrokiti.
Ai vetëm tha me zë të ulët:
Në këtë fermë, duket se duartrokitja është bërë një mënyrë për të mos folur.
Por askush nuk e dëgjoi.
Sepse dallëndyshet po bërtisnin shumë fort.
…
12. Rregulli i Ri i Fermës
Pas dështimit, derrët strategë vendosën të përditësojnë rregullat e fermës.
Ata shkruan në murin e madh:
TË GJITHA KAFSHËT JANË TË BARABARTA.
Kafshët e lexuan dhe tundën kokën me respekt.
Por pak më vonë, derrët shtuan një fjali të vogël poshtë.
…por disa kafshë janë më kafshë se të tjerat.
Kafshët e fermës e lexuan përsëri murin.
Dhelpra buzëqeshi.
Dallëndyshet fluturuan mbi fermë duke shpallur:
Demokracia funksionon!
Dhe kështu në Fermën e Kosovës nuk u kthye qetësia.
Por lajme për qetësinë kishte shumë.
Sepse aty kishte një sekret të vjetër:
nuk është e rëndësishme kush e zgjedh Presidentin.
E rëndësishme është kush e ruan qetësinë kur Presidenti nuk zgjidhet.
…
EPILOG: Qetësia e Detyrueshme
Dhe kështu në Fermën e Kosovës filloi qetësia e detyrueshme.
Dallëndyshet vazhduan të shpallin lajme.
Derrat vazhduan të shkruajnë rregulla.
Ujku vazhdoi të ulërijë nëpër natë.
Kali vazhdoi të kërkojë qetësi.
Ndërsa Presidenti i fermës mbeti i pazgjedhur.
Por historia e zgjedhjes u shkrua gjithsesi.
Sepse në këtë fermë ekziston një urtësi e vjetër:
sekret.
…
P.S.
…dhe kështu u prish një tregim që mund të shkruhej bukur.
AUTOKRITIKË:
Vet e katërta:
unë, autori, narratori dhe dëshmitari.
Kim 4.
Tri të tjerat janë duke pozuar.
Mua më thanë:
Shkruaj ti.
Duku e mençur.
