Roli i SHBA-së, vendimtar për anëtarësimin e Kosovës në NATO

Në Kosovë, çdo vit më 27 nëntor shënohet Dita e Forcës, një ngjarje që lidhet ngushtë me trashëgiminë e Ushtrisë Çlirimtare të Kosovës (UÇK) dhe më vonë me Trupat Mbrojtëse të Kosovës (TMK), ndërsa sot me Forcën e Sigurisë së Kosovës (FSK).

Në edicionin e këtij viti, më 27 nëntor 2025, qytetarët dhe pjesëtarët e ushtrisë festuan përparimet e arritura në modernizimin e FSK-së, që po zhvillohet sipas standardeve më të larta të NATO-s dhe ushtrive perëndimore.

Ish-luftëtarët dhe ish-zyrtarët e UÇK-së e kanë vlerësuar rolin e Forcës në sigurimin e stabilitetit dhe paqes, duke theksuar rëndësinë e bashkëpunimit me partnerët strategjikë, veçanërisht Shtetet e Bashkuara të Amerikës.

Ish-koloneli: FSK e gatshme profesionalisht për NATO, por anëtarësimi është politikë

Ish-koloneli dhe ish-zëdhënësi i Ushtrisë Çlirimtare të Zonës Operative të Llapit, Muharrem Mahmutaj, në një prononcim për “Bota sot” ka vlerësuar se FSK-ja, si pasardhëse e UÇK-së dhe TMK-së, ka bërë përparime drejt profesionalizmit, modernizimit dhe forcimit të identitetit ushtarak sipas standardeve të NATO-s dhe ushtrive perëndimore.

ImageIsh-koloneli dhe ish-zëdhënësi i Ushtrisë Çlirimtare të Zonës Operative të Llapit, Muharrem MahmutajFoto galeri
“Dita e Forcës është një moment krenarie e lidhur pashkëputshëm me UÇK-në dhe me një nga shfaqjet me madhore të historisë – Daljen Publike të UÇK-së ! Si trashëgimtare e UÇK-së dhe pasardhëses se saj TMK-së, FSK-ja ka bërë hapa të rëndësishëm drejt profesionalizmit , modernizimit dhe forcimit te identitetit të saj ushtarak me standardet me të mira të NATO-s dhe ushtrive perëndimore ! Sukseset e FSK -së janë rezultat i angazhimit të pjesëtarëve të saj por edhe i bashkëpunimit dhe mbështetjes se partnerëve tonë strategjik veçanërisht SHBA-së”, ka thënë ai.

Po ashtu, Mahmutaj ka shtuar se FSK-ja ka kapacitetin profesional dhe operacional për të përmbushur standardet e NATO-s, por anëtarësimi i Kosovës varet nga politika dhe marrëdhëniet e jashtme.

“Besoj se në aspektin profesional dhe operacional FSK ja mund t’i plotësoj standartet për të qenë pjesë e NATO-s. Por procesi i anëtarësimit të Kosovës në NATO që është jetike për sigurinë tonë është një proces politik qe varet nga politika. Një politikë e jashtme qe ndërton partnerit me miqtë , një politikë vizionare e bën me të lehtë rrugën e Kosovës drejt NATO-s. Një politikë konfliktueze pa ide dhe pa sens komunikimi me partnerët e vështirëson këtë rrugë. Edhe anëtarësimi i Kosovës në NATO sikurse anëtarësimi ne mekanizma tjerë të rëndësishëm ndërkombëtare mund të bëhet vetëm me përkrahjen e plotë të SHBA-ve”, ka deklaruar Mahmutaj.

“Dita e flamurit është dita e ushtrisë”

Meqenëse Dita e Forcës rastis një ditë para 28 nëntorit, Ditës së Flamurit, ish-luftëtari i Koshares, Milazim Maraj, ka ndarë kujtime nga shënimi i kësaj dite gjatë periudhave të ndryshme historike, duke përfshirë kohën e luftës.

ImageIsh-luftëtari i Koshares, Milazim MarajFoto galeri
Ai e ka quajtur Ditën e Flamurit “ditë të ushtrisë”, duke theksuar rëndësinë e flamurit në identitetin kombëtar dhe historinë e rezistencës shqiptare.

Ai e ka quajtur Ditën e Flamurit edhe ditë të ushtrisë.

“Festa e 28 Nëntorit është festë Kombëtare.

Kjo ditë është festë tradicionale e shqiptarëve, kudo që janë. Kjo është festa e flamurit kombëtar. Për herë të parë, këtë festë shqiptarëve ia bëri Gjergj Kastrioti – Skënderbeu. Ishte ky flamuri i Kastriotëve, të cilin e ngriti në Krujë. Ndërsa për herë të dytë, këtë festë e bëri Ismail Qemali, duke e shpallur festë kombëtare në vitin 1912 në Vlorë. Flamuri ngritet aty ku është vendi yt i lirë.

Ky flamur është ngritur edhe nga të burgosurit tanë politik, të cilët, përkundër dënimeve të rënda, çdo 28 Nëntor e ngritnin flamurin dhe pastaj vuanin dënimet e gjata në burgjet jugosllave me kokën lartë, duke mbrojtur simbolin e tyre kombëtar. Ky flamur ka udhëhequr edhe demonstrata në vitet 1968, 1981 dhe në vazhdimësi. Ai ka qenë prezent edhe në dasma, kur të rinjtë shqiptarë kurorëzonin dashurinë dhe themelonin familje të re, lindnin fëmijë të bukur, inteligjentë dhe të shkathtë.

Por dita e flamurit u përforcua edhe me Ushtrinë Çlirimtare të Kosovës. Ditën e flamurit e festuam edhe gjatë viteve 1998–1999 në qendrat stërvitore si Viçidol, Papaj, Rragam, Padesh dhe më vonë në Koshare. Me ngritjen e këtij flamuri fillonte dita e re, për fitore të reja në luftë. Para këtij flamuri u betuam për ta çliruar vendin tonë të shtrenjtë. Me këtë flamur përcollëm heronjtë dhe martirët tanë në banesën e tyre të fundit.

Të parët tanë betoheshin në këtë flamur: “Për at gjak e besë të burrit, për at zot e shqipe të flamurit”. Në luftë kishim këtë flamur; me këtë flamur hyjmë në betejë. Aty ku e vendosnim këtë flamur, çizme e armikut nuk shkeli më. Me këtë flamur dhe me ndihmën e SHBA-së dhe NATO-s përfunduam luftën në Kosovë. Kjo datë tani lidhet edhe me ditëlindjen e Komandantit Adem Jashari. Familja Jashari tregoi përpara botës se rrënjët tona janë të thella në këtë tokë dhe as vdekja nuk i shkuli nga toka e Dardanisë.

Sakrifica e familjes Jashari tregoi më shumë se çdo histori tjetër deri tani. Në përleshjet me ushtrinë serbe, vendosmëria, trimëria dhe dashuria për atdhe të kësaj familjeje dhe të shqiptarëve u shfaqën qartë. Në këtë ditë u ekspozua edhe panjerëzia serbe dhe planet e tyre gjenocide, robëria si instrument rus në këtë pjesë të Evropës dhe botës, si dhe rreziku që kanoset vazhdimisht paqen në Gadishullin Ilirik. U pa nevoja për korrigjimin e trajtimit përkëdhelës që Evropa dhe bota kishin praktikuar përkundër krimeve dhe tragjedive shekullore të këtij populli.

Më 10 prill të vitit 1999, ky flamur u ngrit në Karakollin e Koshare, në shenjë të çlirimit të kësaj pjese të Dardanisë. Ky flamur nuk u hoq më kurrë nga ky karakoll, që simbolizon lirinë. Pra, dita e flamurit është dita e ushtrisë. Ky flamur kërkohet në mënyrë paqësore edhe nga shqiptarët e Kosovës Lindore, që ende janë nën okupimin serb”, ka rrëfyer ai.

Gjithashtu, Maraj ka treguar edhe fillimet e rindërtimit të ushtrisë së Kosovës.

Ai ka shtuar se sot ushtria është profesionalisht e stërvitur dhe e pajisur me armatim modern, ndërsa qytetarët kanë mundësi të njihen me pajisjet dhe planet për fabrikën e armatimit në Kosovë.

“Ushtria e Kosovës filloi rindërtimin e vet nga viti 1990 dhe vazhdon edhe sot. Dikur Mbrojtja e Republikës së Kosovës, më vonë Ushtria Çlirimtare e Kosovës, pas luftës TMK, pastaj FSK dhe tani Forca Mbrojtëse e Kosovës. Tani kemi një ushtri të stërvitur shkencërisht, me nivele shumë të sofistikuara trajnimesh në shtetet aleate. Kudo në trajnime, ushtarët tanë treguan përkushtim, disiplinë dhe dhunti të trashëguara nga të parët tanë. Sot, në ditën e ushtrisë, qytetarët patën mundësi të vizitojnë forcat tona të mbrojtjes, të njihen me armatimin e tyre modern dhe përgatitjet për ndërtimin e fabrikës së armatimit në Kosovë. Festa e flamurit sot ka kuptim më të madh se çdoherë para vitit 1999. Deri në vitet 1946, në Shqipëri festohej dita e flamurit, ndërsa në Kosovë, Maqedoni dhe Mal të Zi ata që ngrinin këtë flamur burgoseshin, torturoheshin dhe vriteshin nëpër burgje. Tani festojmë së bashku, të lirë, gati në të gjitha trojet e banuara me shqiptarë!”, ka përmbyllur Maraj.