Hysa për incidentin në Shkup: Edhe në kohën time pati tentime të njëjta ndaj Atifete Jahjagës, por s’e lejova

Ish-ambasadori i Kosovës në Maqedoni, Ylber Hysa ka komentuar incidentin e mbrëmshëm ndaj presidentes Vjosa Osmani, ku sigurimi i aeroportit të Shkupit ka tentuar që t’ia marrë telefonin e saj privat dhe ta shtyjnë.

Hysa në emisionin “Magazina” në Radio Dukagjini ka treguar se për raste të tilla ka pasur tentime edhe në kohën e tij ndaj ish-presidentes, Atifete Jahjaga por që ai thotë se ka arritur të menaxhojë që kjo mos të ndodhë.

“Në kohën time ka pasur tentim të bëhet njëjtë me presidenten Atifete Jahjaga, e kam menaxhuar në atë kohë pa ndonjë incident. Nuk e kemi lodhur opinionin publik, nuk e kemi diskutuar”, ka deklaruar Hysa.

Ai ka thënë se ky incident ndonëse mund të cilësohet “sjellje joprofesionale” dhe një keqkuptim i mundshëm nuk është i habitshëm për shkak të politikës aktuale në Maqedoni të Veriut.

“Është një ilustrim i një relacioni të politikës në Maqedoni dhe në raport me të tjerët. Ilustrim se çfarë fryme po merr ky raport dhe çfarë qeverie ekziston në Maqedoni”, ka vijuar Hysa.

Ai pati kritika edhe për kryeministrin, Albin Kurti i cili sipas tij ka bërë çmos që të jetë kjo qeveri aktuale në Maqedoni.

Ndryshe, mbrëmë, presidentes Vjosa Osman u tentua t’i merrej telefoni në Aeroportin Ndërkombëtar të Shkupit, derisa Presidenca ka thënë se pati tentim edhe të shtyhej fizikisht.