Kurti: Në Gjakovë e kemi bazën e Forcës së Sigurisë së Kosovës dhe do ta ndërtojmë edhe fabrikën e municioneve, të parën në Kosovën tonë të lirë e të pavarur

Tubimi i Lëvizjes Vetëvendosje në Gjakovë vërtetoi se përkrahja për një qeverisje të re të udhëhequr nga Albin Kurti është rritur edhe më shumë, qytetarë të rinj, të cilët takohen e bashkohen në tubim, janë dëshmia për këtë.

Kryetari i Qendrës së Lëvizjes në Gjakovë, Agon Batusha, në fjalën hapëse u shpreh se populli do t’i ndëshkojë përsëri partitë tjera, duke bërë thirrje që të mobilizohen të gjithë për të votuar numrin 116 të Lëvizjes VETËVENDOSJE!.

Kryetarja e partisë Alternativa, Mimoza Kusari në fjalën e saj tha se qeveria Kurti 3 është alternativa e vetme qytetare për siguri dhe begati në Republikën e Kosovës. Ajo bëri u bëri thirrje të gjithë qytetarëve të Gjakovës dhe mbarë Kosovës që sa më shumë të angazhohen për fitore edhe më bindëse se në vitin e fundit, në mënyrë që formimi i qeverisë dhe kushtet në dëm të Republikës të mos jenë më problem.

Kryeministri Albin Kurti në fjalën e tij theksoi se vizioni ynë është punë për qytetarin dhe mbrojtje për familjen.

Kryeministri Kurti kujtoi se qarkullimi i bizneseve për 6 vite është dyfishuar. “Bizneset në vitin 2019 kanë qarkulluar 12.5 miliardë euro ndërsa sivjet qarkullimi është rritur në 25 miliardë euro. E sivjet fitimi i koorporatave në Kosovë është 2.3 miliardë euro e para neve me ato qeveritë e kaluar kurrë nuk e kanë prekë as 900 milion.”

Kryeministri Kurti u shpreh se rritja ekonomike mesatare ka qenë 6%, të cilën e kemi mbajtë për shtet por e kemi ndarë në shoqëri. “Këtu në Gjakovë gjatë këtij katërvjeçari kemi investuar në shkolla, në ambulanca, në rrugë, në projekte për ujë të pijshëm dhe ngrohje me biomasë: gjithsej 2 milionë euro mbështetje për ngrohëtoren e Gjakovës. Nënat lehona dhe fëmijët nën 16 vjeç i kemi mbështetur me shtesa, njëhërë 10 euro, pastaj 20 euro, pastaj 30 euro, e në mandatin e ardhshëm këto shtesa do të dyfishohen. Njësoj për nënat lehona kemi filluar më mbështetje financiare, ku për 6 muajt e parë kanë marrë pagën e nivelit e pagës minimale. E pagën minimale e kemi gjetur 170 euro, e kemi bërë 264 euro, tash është 350 euro, prej 1 janarit do të bëhet 425 euro dhe prej 1 korrikut të ardhshëm paga minimale do të bëhet 500 euro që do të thotë se çdo nënë lehonë prej verës së vitit të ardhshëm e tutje i merr 6 muaj pagën e re minimale prej 500 euro, dmth brenda vitit i merr 3 mijë euro.”

Në Gjakovë po investojmë në stadiumin e qytetit, 9 milion euro nga qeveria për “vëllaznimin”. Në Gjakovë e kemi edhe bazën e Forcës së Sigurisë së Kosovës, në Babaj të Bokës do të ndërtojmë hangaret për fluturaket e FSK-së, e po ashtu këtu në Gjakovë në Jahoc do ta ndërtojmë edhe fabrikën e municioneve, të parën në Kosovës tonë të lirë e të pavarur. Përafërsisht një vit prej tani, nga fabrika e municioneve në Jahoc të Gjakovës do të dalin fishekët e parë të prodhuar në vendin tonë. Linja hekurudhore e cila e lidhë portin e Durrësit me portin e thatë të Prishtinës do të kalojë përmes Gjakovës dhe nëpër Shkodër, si një project kombëtar që prosperitet, tregti dhe lidhje edhe më të ngushta me Shqipërinë. Në Gjakovë e sigurojmë Republikën e Kosovës, përmes Gjakovës e lidhim Kosovësn me Republikën e Shqipërisë.”

Kryeministri Kurti theksoi edhe projektet dhe punët që do të bëhen në mandatin e ri: “Do ta ndërtojmë edhe spitalin e ri të Mitrovicës dhe Ferizajt, poliklinikat specialistike në Drenas, Sharr, Podujevë, Viti, Rahovec dhe Leposaviq si dhe poliklinikat specialistike stomatologjike në Prishtinë, Gjakovë, Pejë, Prizren, Gjilan, Mitrovicë, Ferizaj dhe Podujevë.”

Kryeministri Kurti u zotua se në mandatin e ri asnjë vit me më pak se 1 miliardë euro shpenzime kapitale, 1 miliardë euro për ushtrinë e Republikës së Kosovës, do të investohet 500 milion euro në qendrën e skijimit. Do të dyfishohen shtesat për fëmijë dhe nënat lehona, do të rritet paga minimale në 500 euro, do të vazhdojnë të rriten rrogat krahas rritjes ekonomike dhe për të ndikuar fuqishëm rritja e rrogave do të miratohet ligji për cmimet tavan për produktet bazë të shportës, do të ndërtohet rrjeti i laboratorëve publikë për të gjitha llojet e analizave shëndetësore, buxheti për listën e barërave esenciale do të bëhet 100 milion euro së paku, do të bëhet bileta e integruar për trasportin urban dhe ndërurban 10 euro në muaj, do të kemi valutën tonë digjitale, do të fillojë puna në hekurudhën Prishtinë – Durrës, Prizren – Ferizaj, Gjilan – Bujanoc.

Në fund, Kryeministri Kurti prezantoi pesë vendimet e para të mandatit të ardhshëm, përfshirë buxhetin rekord prej 4 miliardë eurosh për vitin 2026, pagën e 13-të për shërbyesit publik dhe pakon për përballje me inflacionin, duke u bërë thirrje qytetarëve që më 28 dhjetor ta mbështesin Lëvizjen VETËVENDOSJE! për vazhdimin e rrugës së zhvillimit, sigurisë dhe begatisë.